1,584,490 të infektuar dhe 94,705 viktima janë regjistruar deri tani nga koronavirusi, teksa herë pas here janë hedhur akuza në vende të ndryshme për fshehje të numrit real të të infektuarve apo viktimave.
Mirëpo, një studim i bërë së fundmi nga shkencëtarët e një universiteti në Gjermani i ka habitur të gjithë sepse ka arritur në përfundimin se deri tani janë zbuluar vetëm 6% e të infektuarve nga koronavirusi.
Sipas tyre, shifra e vërtetë e të prekurve në nivel global mund të ketë arritur në dhjetëra milionë dhe numri total i të infektuarve është shumë herë më i lartë se sa është raportuar nga autoritetet e shëndetësisë në të gjithë botën.
Christian Bommer dhe Sebastian Vollmer nga Universiteti Göttingen në Gjermani analizuan të dhënat nga një studim i fundit i publikuar në gazetën “The Lancet Infectious Diseases”, duke thënë se këto të dhëna tregojnë se shifrat zyrtare nuk janë përfundimtare dhe nuk po jepet informacion i dobishëm.
Sipas studimit të tyre, në Gjermani janë zbuluar 15.6% e rasteve, në Itali janë zbuluar vetëm 3.5% ndërsa në Spanjë 1.7%, në SHBA 1.6% dhe në Britaninë e Madhe, 1.2%.
Autorët thonë se testimi i papërshtatshëm dhe i vonuar mund të jetë arsyeja pse disa vende eUropiane, përfshirë Italinë dhe Spanjën, që po përjetojnë shkallë shumë më të larta të viktimave sesa Gjermania.
