Deputeti i Partisë Demokratike, Gent Strazimiri, ka ngritur akuza të forta ndaj qeverisë dhe kryeministrit Edi Rama lidhur me fondet e Agjencisë Kombëtare të Shoqërisë së Informacionit (AKSHI), duke pretenduar se ky institucion është shndërruar në një mekanizëm për shpërndarjen e qindra milionë eurove të taksapaguesve për sisteme që, sipas tij, nuk funksionojnë.
I ftuar në emisionin “ASHOW”, Strazimiri deklaroi se pas skandalit me fondet e AKSHI-t qëndron drejtpërdrejt kryeministri Rama, duke e cilësuar institucionin si një strukturë që menaxhon shuma të mëdha parash përmes tenderave të diskutueshëm.
Sipas tij, AKSHI është një institucion në varësi të drejtpërdrejtë të kryeministrit dhe përgjegjës për administrimin e sistemeve dixhitale të shtetit, përfshirë databazat dhe platformat online si e-Albania.
“Është direkt Edi Rama. AKSHI është një drejtori në vartësi të drejtpërdrejtë të kryeministrit. Mirlinda e AKSHI-t, në fakt, është Mirlinda e Edi Ramës. AKSHI supozohet të na mbrojë nga pikëpamja dixhitale, virtuale, e internetit dhe e informacioneve; të mbrojë të gjitha sistemet që kemi, sekrete ose jo, databazën e shtetit, si dhe disa operacione të tjera që realizohen përmes platformave si “Diella” apo të tjera, pjesë e propagandës që ata përmendin. Në fakt, asgjë nuk funksionon siç duhet. Edhe e-Albania dhe sisteme të tjera menaxhohen nga AKSHI,” u shpreh Strazimiri.
Deputeti demokrat pretendoi se përmes tenderave të AKSHI-t shpenzohen çdo vit rreth 600 milionë euro për sisteme që, sipas tij, nuk japin rezultatet e pritshme.
“Ne paguajmë për AKSHI-n të paktën 600 milionë euro në vit përmes tenderave, që supozohet të na garantojnë sigurinë dhe funksionimin e këtyre sistemeve, por në realitet kjo nuk ndodh. As e-Albania nuk funksionon, as kadastra online, asnjë prej sistemeve online nuk funksionon siç duhet,” tha ai.
Strazimiri u ndal edhe te sulmet kibernetike që kanë goditur institucionet shqiptare në vitet e fundit, duke deklaruar se pavarësisht investimeve të mëdha në sistemet dixhitale, databazat shtetërore vazhdojnë të jenë të ekspozuara ndaj rreziqeve.
Ai shtoi se fondet e mëdha të administruara nga AKSHI, sipas pretendimeve të ngritura, përfundonin në vendimmarrje që merreshin jashtë institucioneve zyrtare.
“Të gjitha këto 600 milionë euro në vit administrohen nga Mirlinda, e cila varet drejtpërdrejt nga Edi Rama. Ajo, që supozohej të luftonte korrupsionin, i shpërndante fondet jo në zyrën e qeverisë, por në zyrën private të Ergys Agasit, drejtues politik i Partisë Socialiste në qarkun e Durrësit,” deklaroi Strazimiri.
Në vijim të deklaratës së tij, deputeti përmendi edhe një episod që lidhet me një kantinë vere me vlerë 3 milionë euro, e cila sipas tij ishte bllokuar nga SPAK, por u zbraz brenda natës pa u kuptuar se çfarë ndodhi dhe pa u ndëshkuar askush përgjegjës për ruajtjen e saj.
“Vlen 2 milionë euro? S’ka gjë, e bëjmë tenderin 4.” Pra, një fond prej 2 milionë eurosh dyfishohej pa problem. Këto diskutime, sipas akuzave, bëheshin në një zyrë ku konsumohej verë me vlerë 33 mijë euro shishja,” u shpreh ai.
Në përfundim, Strazimiri theksoi se çështja kryesore mbetet funksionimi i drejtësisë dhe përgjegjësia institucionale për fondet publike, duke shtuar se një sistem drejtësie funksional, sipas modelit të vendeve europiane si Franca, Gjermania apo Italia, është thelbësor për garantimin e shtetit ligjor.
