Në Gjykatën e Posaçme kundër Korrupsionit dhe Krimit të Organizuar është zhvilluar sot seanca ndaj Leonard Dukës dhe katër të pandehurve të tjerë, të akuzuar për përfshirje në vrasjen e ish-policit Santiago Malko, ngjarje e ndodhur në gusht të vitit 2019 në zonën e Xhamllikut në Tiranë.
Përveç Leonard Dukës, në bankën e të akuzuarve ndodhen edhe Erlis Duka, Fatmir Hyseni, Aleksandër Maxhaku dhe Oltian Loga, të dyshuar si pjesë e një grupi të strukturuar kriminal që ka planifikuar dhe ekzekutuar Malkon, i cili njihej si “krahu i djathtë” i Ervis Martinajt.
Në këtë seancë ishte parashikuar të dëshmonte Muhamet Duka, babai i Leonard Dukës, por ai nuk u paraqit për shkak të problemeve shëndetësore. Avokatja e tij depozitoi në gjykatë një raport mjekësor justifikues.
Ndërkohë, Leonard Duka ka dhënë dëshminë e tij përballë trupës gjykuese, ku është pyetur nga avokatët dhe përfaqësuesi i SPAK-ut, prokurori Behar Dibra.
Duka mohoi që të ketë pasur ndonjëherë llogari në aplikacionin “Sky ECC” dhe shtoi se nuk ka njohuri për kodet apo përdorimin e tij. Për një fotografi të përfshirë në dosje dhe të zbuluar përmes komunikimeve në Sky ECC, ai deklaroi se personi në imazh nuk është ai.
Megjithatë, ai pranoi se kishte takuar Ervis Martinajn, por mohoi që të kenë pasur komunikime përtej këtij kontakti.
Ndërkohë, SPAK ka dorëzuar në gjykatë prova të reja, përfshirë komunikime të zbardhura nga aplikacioni “Sky ECC”, të cilat sipas prokurorisë përforcojnë dyshimet për lidhje të ngushta mes Leonard Dukës dhe Martinajt.
Në sallë ka pasur edhe momente tensioni. Nëna e Santiago Malkos shpërtheu në akuza ndaj të pandehurit Leonard Duka, duke u drejtuar me fjalët: “S’të fal gjakun e djalit kurrë! Do të vras! Ma fute djalin në dhe!”.
Pas këtij reagimi emocional, trupa gjykuese vendosi ta nxjerrë jashtë sallës.
Në përfundim të seancës, gjykata urdhëroi shtyrjen e saj dhe përsëritjen e fletëthirrjes për dëshminë e Muhamet Dukës në seancën e radhës. Procesi vijon mes provash të reja dhe tensioneve në rritje.
