Presidenti i Francës, Emmanuel Macron, do të mbajë ditën e sotme një takim të veçantë me kabinetin e tij në pallatin “Elysee”, për të diskutuar rreth rastit të spiunimit me softuerin “Pegasus”. Lajmin për grumbullimin e qeverisë franceze në takim, e bëri të ditur zëdhënësi i qeverisë, Gabriel Attal.
”Presidenti do të zhvillojë këtë mëngjes një takim të këshillit të posaçëm të mbrojtjes në pallatin “Elysee” mbi çështjen Pegasus dhe mbi sigurinë kibernetike”, tha Attal. Franca po heton për pretendimet se Maroku mund të ketë shënjestruar celularët që i përkasin presidentit Emmanuel Macron, si dhe 15 ministrave të tij, duke përdorur një sistem spiunimi nga kompania izraelite “NSO Group”, shkruan Reuters.
Prokurorët e një Gjykate Penale në Paris, njoftuan se do të fillonin hetimet mbi një raport të botuar se disa gazetarë francezë, dyshohet se ishin subjekt i piraterisë nga Maroku, duke përdorur mjetet e NSO. Website hetimor “Mediapart”, gazeta satirike “Le Canard Enchaine” dhe grupi “Reporterët pa Kufij”, kishin dërguar ankesa te prokurorët, duke u kërkuar atyre të shikonin çështjen.
Hetimi do të shqyrtojë 10 akuza të ndryshme, duke përfshirë nëse ka pasur një komplot kriminal, nëse privatësia e dikujt është cenuar ose nëse është në telefonat e tyre është futur sistemi i spiunimit.
