Dyshimet se lideri i opozitës ruse Alexei Navalny është helmuar janë pohuar edhe nga spitali në Berlin ku po trajtohet në gjendje të rënduar shëndetësore Navalny.
Sipas provave klinike të realizuar në spitalin Charité, mjekët dolën në përfundimin se Navalny ka shenja helmimi.
“Ekipi i mjekëve ekzaminoi me hollësi pacientin pas arritjes së tij. Gjetjet klinike flasin për helmim nga një lëndë që bën pjesë në grupin e substancave aktive të quajtur ‘frenues të kolinesterazës’”, tha spitali në një deklaratë.
Kujtojmë se kundërshtari i presidentit rus Vladimir Putin, Navalny u sëmur rëndë të enjten e kaluar, ndërsa aleatët e tij besojnë se ishte një helmim. Navalny u dërgua të shtunën në Gjermani për trajtim me një avion ambulancë.
Përkrahësit e tij dyshojnë se lënda helmuese ishte hedhur në një filxhan çaji që ai piu në aeroport në Tomsk.Mjekët rusë insistuan më parë se nuk ishte gjetur helm në trupin e tij dhe sugjeruan një çrregullim metabolik të shkaktuar nga sheqeri i ulët në gjak.
Por zyrtarët rusë shëndetësorë treguan se gjurmët e një lënde kimike industriale ishin gjetur në lëkurën dhe flokët e tij.Kreu i opozitës është në kujdesin intensiv dhe është ende në gjendje kome.
