Raundi i dytë i negociatave mes Ukrainës dhe Rusisë pritet të mbahet më 2 qershor në Stamboll, Turqi.
Ukraina ka dorëzuar më parë një dokument me kushtet për armëpushim ndaj Rusisë, por Kremlini nuk ka dhënë ende përgjigje zyrtare, duke planifikuar që “memorandumi” të prezantohet vetëm gjatë takimit.
Iniciativa për këtë raund të dytë u bë publike nga Ministri i Jashtëm rus, Sergej Lavrov, i cili deklaroi se delegacioni rus, i udhëhequr nga ndihmësi i presidentit Vladimir Medinsky, do t’i prezantojë Ukrainës një memorandum në Stamboll. Lavrov shprehu shpresën që të dyja palët të mbështesin vazhdimin e negociatave më 2 qershor.
Sipas burimeve ruse, takimi do të zhvillohet në orën 13:00 në Pallatin Çırağan të Stambollit.
Nga ana e Ukrainës, presidenti Volodymyr Zelensky ka miratuar përbërjen e delegacionit negociator, që do të drejtohet nga ministri i Mbrojtjes, Rustem Umerov. Në grupin negociator janë përfshirë përfaqësues nga Ministria e Mbrojtjes, Zyra e Presidentit dhe Forcat e Armatosura të Ukrainës.
Delegacioni rus pritet të mbajë të njëjtën përbërje si në raundin e parë, me Medinsky në krye, sipas zëdhënëses së Ministrisë së Jashtme ruse, Maria Zakharova.
Kushtet kryesore që Ukraina do të kërkojë gjatë negociatave janë armëpushimi, lirimi i të burgosurve dhe kthimi i fëmijëve.
