Në ditën që Ilaria Sula do të festonte 23-vjetorin e lindjes, prindërit e saj kanë përkujtuar me dhimbje vajzën që humbën në mënyrë tragjike.
Në Capranica Prenestina, në vendin ku ajo u gjet e pajetë pasi u vra mizorisht nga 23-vjeçari që më pas e hodhi trupin e saj, është ngritur një memorial në nder të saj.
Babai i Ilarias, Flamur Sula, ka shprehur mirënjohjen për të gjithë ata që kanë treguar solidaritet dhe mbështetje në këto kohë të vështira.
“Faleminderit të gjithëve, Komunës dhe kryetarit të Capranica Prenestina për zemrën e madhe dhe për gjithçka që është bërë për vajzën time Ilaria,” tha ai.
Në një dedikim emocional në rrjetet sociale, ai kujtoi me lot në sy ditëlindjen e vajzës:
“Ke qenë dhurata ime më e bukur, gëzuar ditëlindjen princesha ime! Më mungon shumë,” shkroi ai, duke ndarë edhe foto të momentit kur në qiell u lëshuan tullumbace të bardha në kujtim të saj.
Gjatë ceremonisë përkujtimore, mori pjesë edhe kryetari i komunës, Francesco Colagrossi, i cili theksoi rëndësinë e këtij memoriali si simbol i dashurisë së pafund të familjes dhe komunitetit për Ilarian.
“Fotografia e saj me buzëqeshje dhe plot jetë na kujton ëndrrat dhe shpresat që ajo kishte. Kjo përkujtimore është një dëshmi se dhuna e pakuptimtë nuk duhet të fshijë kurrë kujtimin për jetën,” u shpreh Colagrossi.
Gjatë inaugurimit të memorialit, përveç prindërve të Ilarias ishte i pranishëm edhe kryetari i komunës së Capranica Prenestina, Francesco Colagrossi.
Ai u shpreh se ky memorial, i vendosur në vendin ku u gjet trupi i saj, është një dëshmi e dashurisë së pafund të familjes së saj për të.
“Ne morëm pjesë me shumë emocion në inaugurimin e përkujtimores për Ilarian. Ky memorial, i vendosur në vendin ku u gjet trupi i saj, është një dëshmi e dashurisë së pafund të familjes së saj për të. Fotografia që na tregon Ilarianë buzëqeshur, plot jetë, në vitet më të bukura të jetës, ato të projekteve, shpresave dhe ëndrrave, që një dhunë e pabesueshme, e paarsyeshme dhe absurde i ka shuar me brutalitet.
Komuniteti ynë u bashkua me dhimbjen e thellë të familjes, të të afërmve dhe miqve që morën pjesë në këtë ceremoni. Njerëz të thjeshtë, por krenarë dhe të ndershëm, që përballen me jetën çdo ditë me dinjitet dhe sakrificë. Ne i falënderojmë që ndanë me ne këtë moment të shenjtë dhe intime. Ky vend, nga i cili mund të shihni bukurinë e natyrës si asgjëkundi tjetër, do të jetë përjetësisht një kujtim për ty, Ilaria e dashur, dhe do na bëjë të reflektojmë mbi kuptimin e jetës, vlerën e saj dhe se si të mbrohemi nga një dashuri e sëmurë dhe shkatërruese,” u shpreh kryetari.
