Një fabrikë përpunimi sallamesh në Tiranë është ekspozuar përmes pamjeve tronditëse që dëshmojnë një prej rasteve më flagrante të shkeljes së sigurisë ushqimore në Shqipëri.
Mishi i kalbur, i mykur, i hedhur në tokë dhe pa asnjë standard ruajtjeje, grihet dhe përzihet me ngjyrues e erëza për t’u transformuar në sallam e qofte që më pas tregtohen për konsum.
Sipas raportimit nga “Ora News”, kjo fabrikë funksionon në kundërshtim të plotë me çdo normë higjieno-sanitare, ndërsa produktet e përftuara shpërndahen në treg pa asnjë kontroll të vërtetë. Megjithatë, “Ora News” nuk ka guxuar të bëjë publik emrin e kësaj kompanie që po vret qytetarët, duke u bërë pjesërisht ‘bashkëfajtore’.
Pamjet e tmerrshme tregojnë mish me ngjyrë të errët, të shpërndarë në dysheme dhe arka plastike të çara, që përpunohet mekanikisht dhe përzihet me substanca ngjyrimi dhe shumë erëza për të fshehur shenjat e prishjes.
Përveç mishit, janë identifikuar edhe sasi sallamesh të mykura, që ripërpunohen për konsum të mëtejshëm.
Tepër shqetësuese është edhe mungesa e reagimit nga institucionet përkatëse.
Burime brenda sektorit thonë se inspektorët e Autoritetit Kombëtar të Ushqimit kanë qenë të informuar për këtë aktivitet kriminal, por kanë mbyllur sytë në këmbim të ryshfetit.
Kjo tregon jo vetëm tolerim, por bashkëpunim të heshtur institucional me praktika që vënë në rrezik jetën e mijëra qytetarëve.
Shqipëria ka një histori të përsëritur skandalesh ushqimore që dëshmojnë një sistem të dështuar.
Kujtojmë skandalet e ngjashme në sektorin ushqimor, duke përfshirë mishin me salmonelë të shitur nga KFC, mishin e kalbur në sasi industriale (27 tonë), peshkun me parazitë dhe produkte të kontaminuara me pesticide të rrezikshme, si mandarinat, luleshtrydhet dhe specat.
Analizat laboratorike të substancave të përdorura në përpunimin e këtyre produkteve kanë treguar rrezik të lartë për sëmundje si kanceri, çrregullimet hormonale, dëmtimet e sistemit nervor dhe infertiliteti.
Ky skandal është një sinjal alarmi se Shqipëria përballet me një krizë të thellë besimi dhe sigurie në zinxhirin ushqimor. Nëse sistemi i kontrollit vazhdon të funksionojë mbi ryshfet dhe fshehje, nuk kemi të bëjmë më me dështim, por me bashkëfajësi.
Në këtë kontekst, reagimi qytetar bëhet i domosdoshëm. Bojkoti i kompanive që abuzojnë me standardet dhe presioni mbi institucionet që fshehin skandale duhet të jetë përgjigjja më e drejtpërdrejtë.
Pa një ndërgjegjësim dhe rezistencë të fortë nga vetë konsumatorët, zinxhiri i korrupsionit dhe krimit ushqimor do të vazhdojë të zgjerohet në kurriz të shëndetit publik.
