Një tjetër skandal që ka ndodhur në spitalet publike në vend është zbardhur mbrëmjen e sotme. Emisioni BOOM në Ora News ka denoncuar rastin e Anila Zeqirit në Vlorë, e cila e kishte shtruar të atin në spital që prej 27 dhjetorit të vitit të kaluar. Prej më shumë se dy muajsh ajo nuk ka pasur dijeni se ku ndodhej babai i saj dhe i ka dërguar vazhdimisht ushqime në spital.
Anila Zeqiri: Unë nuk e di se ku e kam babain. Kam marrë ambulancën për babin dhe e çova në spital, ku me morën emër mbiemër. Ai ka qëndruar nga data 27 deri në datën 10 më kanë thënë që është shtruar në spital dhe unë i çoja ushqime. Pastaj më thanë se nuk ndodhej aty, por ndodhej në Tiranë. Atje më thanë se nuk ishte aty dhe deri më sot kam ngelur kështu pezull. Nuk e di se sa më fshehën. Unë po çmendem se nuk e di nëse është gjallë apo ka ndërruar jetë.
Kur vajza shkon në spitalin e Vlorës për të pyetur se ku ndodhet babai, nuk i jepet informacion.
Mjekët: Ka ikur më 27 dhjetor, 2 herë në Tiranë. Ka ardhur dhe ka ikur sërish atje. Ka qenë në urgjencë dhe është nisur për në Tiranë më 27 dhjetor. Ti mos na kërko babain tënd ti, mos të të zë me dacka!
Familjari: Ju nuk merrni ndonjë kontakt me ata të Tiranës se çfarë ndodh?
Mjekja: Jo nuk kemi kontakte, sepse është spital Covid ai.
Ministria e Shëndetësisë kontakton menjëherë familjarët sapo e kupton që rasti në fjalë do të bëhet mediatik.
Mjeku: Më datë 27 dhjetor më datë 4 pa një çerek ka ardhur nga urgjenca e Vlorës. Më datë 6 janar ka ndërruar jetë dhe është dërguar në morg dhe aty është akoma dhe mbahet në kushte frigoriferike.
Familjari: Pse nuk është njoftuar spitali i Vlorës që ky ka vdekur? Nuk njoftohet në këto raste? Kjo është papërgjegjshmëri!
Vetëm pas denoncimit të rastit familjarët kanë mundur të tërheqin trupin e të ndjerit nga morgu plot 70 ditë pasi kishte ndërruar jetë.
