Kanë kaluar disa javë që kur emisioni investigativ “Stop” transmetoi për herë të parë skandalin seksual në shkollën e mesme artistike “Jakov Xoxa” në Fier, i cili u thellua javë pas jave.
Mësuesi Agron Bego i ofronte ndihmë një nxënëseje që kishte bërë mungesa, duke i kërkuar në këmbim favore seksuale, madje i tregoi se kishte punuar edhe zhigolo në shtëpi publike dhe ishte i të “99-tave”, teksa e “këshillonte” vajzën të mos kryente marrëdhënie me bashkëmoshatarë, pasi ata nuk dinë.
Pas publikimit të këtij skandali, Bego u pezullua nga shkolla dhe ndaj tij u mor masa e arrestit “burg pa afat”, teksa rasti po hetohet nga prokuroria, teksa emisioni zbuloi se në skandal ishin të përfshirë edhe mësues të tjerë.
Kështu, pas Begos u denoncua dhe Vasil Niko, i cili kishte shkëmbyer mesazhe me një nxënëse.
Së fundmi, Ministria e Arsimit, Rinisë dhe Sporteve ka reaguar rreth këtij skandali dhe me anë të një reagimi në faqet zyrtare online, njofton se janë marrë të gjitha masat për rastin në fjalë dhe se të gjithë personat e dyshuar si të përfshirë për abuzime ndaj nxënësve në rastin e një shkolle në Fier janë shkarkuar apo janë duke u ndjekur edhe penalisht.
Sipas njoftimit, rregullorja e re e arsimit parauniversitar parashikon dënimet më të larta për ata që nuk punojnë në të mirën e nxënësve, abuzojnë apo përdorin çfarëdo lloj forme të dhunës në shkollë.
Njoftimi nga MASR
Të gjithë personat e dyshuar si të përfshirë për abuzime ndaj nxënësve në rastin e një shkolle në Fier janë shkarkuar apo janë duke u ndjekur edhe penalisht. Drejtoria e Përgjithshme e Arsimit Parauniversitar ka marrë masa të tjera të menjëhershme si ndryshimin i pjesëtarëve kryesorë të stafit të institucionit arsimor, dhënien e ndihmës psiko-sociale, ndërsa ndjekim nga afër çdo zhvillim në lidhje me hetimet e organeve kompetente. Parandalimi është kyç, prandaj rregullorja e re e arsimit parauniversitar parashikon dënimet më të larta për ata që nuk punojnë në të mirën e nxënësve, abuzojnë apo përdorin çfarëdo lloj forme të dhunës në shkollë. Masat janë marrë edhe pse jemi ende në gjendjen e dyshimeve dhe jo përfundimeve finale, që tregon seriozitetin me të cilin MASR dhe institucionet e varësisë marrin në raste të tilla.
Natyrisht, masat e ndërmarra nuk janë trumbetuar në media për shkak se qëllimi ynë nuk është të bëjmë dëm duke ekspozuar ata që ndihen të dëmtuar. Gjë, të cilën po e bëjnë ata që nuk po rreshtin së shfrytëzuari në mënyrë makabre këtë rast për tërheqje vijueshmërie mediatike apo qërim hesapesh politike. Ky është abuzim në vete dhe si MASR kemi detyrimin të luftojmë edhe këtë formë të abuzimit në mbrojtje të nxënësve tanë.
