Institucionet e dijes në vend po ekspozohen si vatra korrupsioni, ku tenderat publikë kthehen në mjet abuzimi dhe jo në shërbim të zhvillimit. Hetimet e fundit të Agjencisë së Prokurimeve Publike (APP) kanë nxjerrë në pah shkelje të rënda në disa universitete dhe në Akademinë e Shkencave, duke çuar në pezullimin e dhjetëra punonjësve.
Universiteti “Luigj Gurakuqi” i Shkodrës është një prej rasteve më të rënda, ku janë konstatuar parregullsi në 9 procedura tenderimi, që nga hartimi i specifikimeve deri te shpallja e fituesve. Si pasojë, APP i ka propozuar titullarit të institucionit marrjen e masave disiplinore për 20 punonjës.
“Në bazë të nenit 23/e dhe nenit 132, pika 3, të Ligjit Nr. 162/2020 ‘Për prokurimin publik’, i ndryshuar, APP vendosi të propozojë marrjen e masës disiplinore ndaj 20 (njëzet) personave, të evidentuar përgjegjës për shkelje dhe mangësi të konstatuara në vendim,” theksohet në raportin e monitorimit.
Një situatë e ngjashme u zbulua në Universitetin e Elbasanit, ku u evidentuan shkelje në disa procedura dhe u kërkua ndëshkimi disiplinor për 8 punonjës. Në raport thuhet: “APP vendosi t’i propozojë titullarit të Autoritetit Kontraktor, marrjen e masës disiplinore ndaj 8 (tetë) personave, të evidentuar përgjegjës për mangësi të konstatuara në vendim.”
Një tjetër skandal i turpshëm është ai i Akademisë së Shkencave, institucioni që pritej të ishte model i integritetit dhe dijes. Në fakt, APP ka evidentuar parregullsi të rënda dhe ka kërkuar pezullimin e 7 punonjësve të saj për abuzime me tenderat publikë. “APP vendosi t’i propozojë titullarit të Autoritetit Kontraktor, marrjen e masës disiplinore ndaj 7 (shtatë) personave, për mangësi të evidentuara në vendim,” shkruhet në raportin hetimor.
Edhe pse nuk janë bërë publike llojet e masave disiplinore, fakti që vetëm në tre institucione janë kapur 35 punonjës të përfshirë në abuzime me tendera, mjafton për të treguar se institucionet e dijes prodhojnë më shumë korrupsion sesa shkencë. Kjo tablo i shtohet edhe rasteve të fundit të goditura nga SPAK, si arrestimet në Kamëz, duke dëshmuar se korrupsioni nuk kursen as ambientet që duhej të ishin të shenjta për zhvillimin e shoqërisë.
