Një tjetër skandal i rëndë mban sërish emrin e Wizz Air. Mbrëmjen e djeshme, fluturimi i planifikuar për në orën 22:55 nga Bologna drejt Tiranës rezultoi i tejmbushur, duke lënë jashtë avionit 13 pasagjerë, mes tyre edhe fëmijë. Pa asnjë paralajmërim, pa sqarime, pa alternativa, pa kompensime. Vetëm një qëndrim cinik nga ana e stafit: “Nuk kemi çfarë të bëjmë.”
Një avaz i përditshëm i një kompanie që prej vitesh trajton qytetarët shqiptarë si pasagjerë të dorës së dytë. Wizz Air shet më shumë bileta sesa lejon kapaciteti i avionit, luan me fatin e njerëzve, i lë të bllokuar nëpër aeroporte dhe nuk mban asnjëherë përgjegjësi. Kompania që operon përfitime milionëshe në Shqipëri, është bërë simbol i skandaleve, abuzimeve dhe një arrogance të paimagjinueshme ndaj qytetarëve.
Ankesat janë të përditshme. Qytetarët denoncojnë vonesa sistematike në çdo fluturim, anulime të njëanshme pa njoftim, rishitje të biletave me çmime më të larta, tarifa të fshehta për çdo shërbim bazik dhe një mungesë totale transparence. Gazeta Reforma ka raportuar vazhdimisht për këto shkelje të rënda, por autoritetet shqiptare vijojnë të heshtin. Asnjë hetim. Asnjë masë. Asnjë sanksion.
Ndërkohë në vende si Spanja, autoritetet veprojnë me forcë. Ministri i të Drejtave Sociale dhe Konsumatorit, Paolo Bustinduy, njoftoi se edhe Wizz Air do të sanksionohet për tarifat abuzive për bagazhet e dorës, duke u bashkuar me kompanitë e tjera të ndëshkuara si Ryanair, EasyJet, Vueling, Norwegian dhe Volotea. Gjobat totale të vendosura nga shteti spanjoll kapin shifrën e 179 milionë eurove. Praktikat e tilla janë cilësuar si të paligjshme dhe në dëm të drejtpërdrejtë të pasagjerëve.
Në Shqipëri, në vend të gjobave, kemi heshtje. Në vend të mbrojtjes së qytetarëve, kemi nënshtrim ndaj abuzuesve. Është e papranueshme që një kompani ajrore të vijojë të shkelë me këmbë çdo standard të etikës dhe ligjit pa pasur frikë nga asnjë institucion shqiptar. Sa herë do të përsëritet ky skenar? Sa herë duhet të mbeten qytetarët shqiptarë nëpër aeroporte të huaja, të pastrehë, të pasigurt, vetëm sepse një kompani vendos të luajë bixhoz me jetën e tyre?
Shqipëria ka nevojë për një autoritet të vërtetë mbrojtës të konsumatorëve, që vepron dhe ndëshkon, që nuk toleron abuzimet dhe nuk fshihet pas burokracisë. Derisa kjo të ndodhë, Wizz Air do të vazhdojë të jetë sinonim i skandalit dhe shteti shqiptar, bashkëfajtor në heshtje.
