Pas zhgënjimit në finalen e Ligës së Kampionëve, tifozët e Interit përballen me një tjetër goditje, trajneri Simone Inzaghi i ka dhënë fund qëndrimit në krye të skuadrës.
Burime pranë klubit konfirmojnë se tekniku italian pritet të firmosë këtë javë me skuadrën saudite Al Hilal, me një kontratë trevjeçare dhe një ofertë financiare të konsideruar “marramendëse”.
Largimi i Inzaghit u konfirmua pas një takimi vendimtar më 3 qershor me drejtuesit e klubit zikaltër, ku u diskutua e ardhmja e tij pas finales. Vendimi për t’u larguar u mor pas këtij takimi.
Ndërkohë, Interi ka nisur menjëherë nga puna për të gjetur pasuesin. Në listën e kandidatëve për pankinën zikaltër përfshihen emra të njohur si trajneri aktual i Comos, Cesc Fàbregas, Roberto De Zerbi që drejton Marseille dhe Cristian Chivu, i cili po drejton Parmën dhe ka qenë më parë pjesë e klubit si lojtar.
Zëvendësimi i Inzaghit do të jetë vendim kyç për drejtuesit e Interit, në një moment kur skuadra kërkon të ruajë nivelin konkurrues në Europë dhe Serie A.
