Është shtyrë sërish seanca gjyqësore për çështjen e privatizimit të kompleksit “Partizani”, ku të pandehur janë Sali Berisha dhe dhëndri i tij, Jamarbër Malltezi.
Seanca e parashikuar për këtë të premte nuk u zhvillua për shkak të mungesës së avokatit të Xhimi Begejës, një prej të akuzuarve në këtë dosje.
Seanca e radhës është caktuar për të martën, më 15 prill, në orën 14:00.
Gjyqtarja Flojera Davidhi pritej të vendoste sot nëse çështja do të kalonte ose jo për gjykim, pasi prokurorët e SPAK do të jepnin replikën përfundimtare mbi argumentet e paraqitura nga pala mbrojtëse.
Berisha dhe Malltezi janë nën hetim për mënyrën e privatizimit të ish-klubit sportiv “Partizani”, një proces që ka tërhequr vëmendje të gjerë publike dhe politike.
