Disa ditë më parë në një konferencë për mediat, presidenti Ilir Meta i bëri thirrje popullit që më 2 mars të dalë në bulevardin ”Dëshmorët e Kombit”, përpara Kryeministrisë për të lidhur besën për të shpartalluar atë që e quan grusht shteti.
Ai theksoi se më 2 mars do të firmosë dekretin e parë përballë popullit në Bulevard për të shpartalluar grushtin e shtetit që po planifikon qeveria.
Kjo deklaratë u shoqërua me reagime të ndryshme si nga mazhoranca, ashtu edhe nga persona të tjerë ku nuk munguan as akuzat ndaj kreut të vendit.
Lexo: “Metra ka vrarë dhe do të destabilizojë vendin që të shpëtojë vet”, gazetari bën deklaratën e fortë.
E megjithatë Meta është i vendosur në atë çka do të bëjë pasi e ka nisur mëngjesin e sotëm me një tjetër thirrje ndaj qytetarëve që t’i bashkohen protestës në 2 mars në Bulevardin “Dëshmorët e Kombit”.
Ai thekson se vendi ynë nuk do të jetë më lavatriçe e pastrimit të parave të organizatës ndërkombëtare, duke marrë shkas nga një raporti i Task Forca Financiare (FATF) e MONEYVAL, në të cilin thuhet se Shqipëria është sërish në listën gri të pastrimit të parave.
Lexo: Shqipëria në listë gri të pastrimit të parave, nën vëzhgim nga KE
REAGIMI I METËS
Të dashur qytetarë!
Asnjë habi për hapat pas që Shqipëria ka bërë edhe në këtë drejtim.
Ndaj në 2 mars të gjithë në Bulevardin “Dëshmorët e Kombit” në mbrojtje të Kushtetutës dhe integritetit të Gjykatës Kushtetuese, për të rivendosur sistemin e llogaridhënies publike në çdo nivel vendor dhe qendror, në të gjithë vendin.
Shqipëria nuk do të jetë më lavatriçe e pastrimit të parave të organizatës ndërkombëtare.
Bashkë për Kushtetutën!
Bashkë për Shqipërinë!
Po ashtu, ditën e djeshme presidenti Ilir Meta ka paralajmëruar se brenda ditës së hënë do të kallëzojë penalisht në Prokurorinë e Posaçme (SPAK) ministren e Drejtësisë, Etilda Gjonaj, ndërsa i ka kërkuar që të japë sa më parë dorëheqjen dhe të përballet me drejtësinë.
Sipas kreut të shtetit, ministrja akuzohet për disa vepra penale, si shpërdorim detyre, falsifikim dhe ndërhyrje të paligjshme në procesin e përzgjedhjes së anëtarëve të Këshillit të Emërimeve në Drejtësi.
