Shqipëria është përfshirë zyrtarisht në hartën europiane të identifikimit të kafshëve, një zhvillim që konsiderohet historik nga Presidenti i Urdhrit të Mjekut Veterinar, Ervin Resuli.
Përmes një postimi në rrjetet sociale, Resuli bëri të ditur se ky hap është përshëndetur edhe nga Unioni Europian i Veterinerëve të Praktikës, një prej organizatave më të rëndësishme të profesionistëve të fushës në kontinent.
Sipas UEVP-së, marrëveshja mes Autoritetit Kombëtar të Veterinarisë dhe Urdhrit Profesional të Mjekut Veterinar të Shqipërisë për identifikimin dhe regjistrimin e kafshëve të shoqërimit, përbën një arritje të madhe drejt përafrimit me standardet europiane.
Ajo vendos themelet për një sistem të gjurmueshëm, të sigurt dhe ligjërisht të mbështetur për mikroçipimin dhe pasaportimin e qenve e maceve.
Dokumenti u nënshkrua më 30 prill 2025 nga Presidenti i UPMVSH, Dr. Ervin Resuli, dhe drejtori i përgjithshëm i AKVMB, Sulejman Kulolli. Parashikohet që vetëm veterinerët e licencuar nga Urdhri do të kenë të drejtën për të ushtruar këtë shërbim.
Ky sistem, përveç mirëqenies së kafshëve, synon të forcojë edhe mbrojtjen e shëndetit publik, përmes monitorimit të sëmundjeve zoonotike të rrezikshme si tërbimi, lehismaniaza, echinokokoza dhe toksoplasmoza.
UEVP e konsideron këtë marrëveshje si një shembull konkret të funksionimit të modelit europian në Shqipëri, ku Urdhri i Veterinerëve merr rolin e garantuesit të standardeve dhe rregullatorit të profesionit.
