Coronavirusi vijon të përhapet me shpejtësi, dhe sikundër ishte paralajmëruar nga OBSH më shumë të prekur ka tashmë jashtë Kinës, teksa janë regjistruar 90 mijë të infektuar dhe mbi 3 mijë të vdekur.
Ditën e sotme Kina ka regjistruar vetëm 125 raste të reja të infektuar nga COVID-19, duke arritur nivelin më të ulët në 6 javët e fundit, si dhe është raportuar për 31 viktima, të gjitha të përqendruara në epiqendrën e provincës të epidemisë Hubei.
Situata vijon të jetë problematike në Korenë e Jugut, ku janë raportuar 600 raste të reja, duke e çuar numrin e përgjithshëm të infeksioneve në 4,812, me një rritje alarmante në Daegu, qyteti ku ndodhet Kisha e Jezusit.
Ashtu si Kina, edhe Italia në 24 orët e fundit ka regjistruar numrin më të vogël të të infektuarve krahasuar me ditët e mëparshme, si edhe është rritur numri i të shëruarve.
Në vetëm një ditë ka patur 66 pacientë që kanë rezultuar negativ nga testet e Coronavirusit për një total prej më shumë se 160 personash të shëruar, kurse numri i viktimave që nga fillimi i epidemisë është 52.
Të infektuar janë regjistruar edhe në Greqi (8), ku janë mbyllur edhe shkollat, si dhe në Maqedoninë e Veriut (2), ku virusi fatmirësisht nuk ka përparuar shumë.
Ndërkohë në vendin tonë dhe në Kosovë nuk ka asnjë të prekur nga Coronavirusi, pasi të gjitha rastet e dyshuara kanë rezultuar negativ.
Mirëpo, teksa i kemi shpëtuar virusit që ka goditur botën, duket se gripi sezonal po paraqet rrezikshmëri të lartë.
Në spitalin Infektiv dhe në spitalin “Shefqet Ndroqi” ka të sëmurë rëndë me komplikacione të gripit sezonal, të cilët po trajtohen me terapi intesive.
Në një javë raportohen 21.763 të prekur, duke shënuar afro 19% më shumë raste se e njëjta periudhë e vitit të kaluar.
Nga këto, janë 186 raste të rënda, të cilat edhe Instituti i Shëndetit Publik thekson se duhen mbajtur në vëzhgim nga mjekët intesivisht.
Në javën e fundit të shkurtit ka mbizotëruar virusi i gripit tipi B, ndërsa në janar ka mbizotëruar qarkullimi i virusit tipi A.
