Presidenti i Republikës së Shqipërisë, Ilir Meta, ka kujtuar eksodin e 30 viteve më parë, kur mijëra shqiptarë udhëtuan drejt brigjeve të Italisë me anijen “Vlora”.
Nëpërmjet një statusi në rrjetin e tij social “Facebook”, presidenti Meta shprehet eksodi i 1991-it, i dëshmoi botës tragjedinë e një populli të shtypur dhe se anija “Vlora” me simbolikën dhe kujtimet që sjell, na fton për një reflektim mbi sakrificat njerëzore për të ndërtuar një të ardhme më të mirë.
Postimi i Ilir Metës:
“Si sot 30 vite më parë, më 8 gusht 1991, rreth 20 mijë shqiptarë zbarkuan në brigjet e Italisë, në kërkim të lirisë dhe shpresës, duke i dëshmuar botës tragjedinë dhe mjerimin e popullit më të shtypur dhe të izoluar të kontinentit.
Anija ‘Vlora’, me të gjithë simbolikën, emocionet e forta dhe kujtimet e gjalla që risjell, na fton për një reflektim të thellë mbi sakrificat e jashtëzakonshme njerëzore, në emër të së cilave duhet të punojmë, për të ndërtuar një të ardhme më të mirë dhe dinjitoze për qytetarët tanë, veçanërisht kur shpopullimi është drama më e madhe, që po i ndodh vendit”, shkroi presidenti i Shqipërisë, Ilir Meta.
Kujtojmë që në kuadër të 30 vjetorit të këtij eksodi, reagoi edhe Lulzim Basha, i cili u shpreh se për fat të keq, kjo situatë ekziston dhe sot, për shkak të diktaturës korruptive.
