Një operacion i përbashkët mes autoriteteve të Kosovës dhe Shqipërisë ka shkatërruar një grup të trafikut të armëve që operonte ndërmjet këtyre dy shteteve.
Gjatë këtij operacioni, janë arrestuar 15 persona dhe janë kapur rreth 50 armë, përfshirë pistoleta dhe armë të ndryshme.
Operacioni ka përfshirë hetime të koordinuara që kanë zgjatur rreth nëntë muaj dhe ka pasur për qëllim goditjen e një grupi kriminal që kryente shit-blerje armësh të ndryshme, kryesisht modele të tilla si “Zoraki”.
Si pjesë e operacionit, më 11 dhjetor janë arrestuar 8 persona, ku 6 janë nga Kosova dhe 2 nga Shqipëria. Po ashtu, janë kryer kontrolle dhe bastisje në disa lokacione, gjatë të cilave janë sekuestruar 32 pistoleta, një armë AK 47, një granatë dore ofensive, dhe rreth 470 fisheke të llojeve të ndryshme.
Gjithashtu, janë konfiskuar 3 automjete dhe një sasi e konsiderueshme parash, si dhe 10 aparate celulare.
Prokuroria e Tiranës ka dhënë një reagim zyrtar, duke theksuar se hetimet për këtë grup kriminal kanë nisur 9 muaj më parë. Ajo ka njoftuar se janë lëshuar 14 urdhër-arreste, ku 8 persona janë arrestuar në Kosovë dhe 6 në Shqipëri.
Personat e arrestuar në Shqipëri janë: Euxhenio Manushi (20 vjeç), Endri Papa (34 vjeç), Aurel Manreka (28 vjeç), Gersi Llozha (22 vjeç), Kleo Muçalliu (26 vjeç) dhe Tonin Shkambi (53 vjeç). Gjatë operacionit, janë sekuestruar gjithashtu 22 pistoleta ‘Zoraki’, një AK 47, dhe një sasi municioni, si dhe disa automjete.
Autoritetet e Kosovës kanë njoftuar gjithashtu se Prokuroria Speciale e Republikës së Kosovës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, ka shkatërruar këtë grup kriminal të trafikut të armëve pas një hetimi të gjatë. Ata kanë zhvilluar kontrolle në nëntë lokacione dhe kanë sekuestruar 29 pistoleta, 3 armë të gjata të ndryshme, 2635 fishekë, dy automjete dhe pajisje të tjera. Sipas autoriteteve kosovare, janë arrestuar gjithsej 8 persona, 6 nga Kosova dhe 2 nga Shqipëria.
Ky operacion i përbashkët synon goditjen e rrjeteve të trafikut të armëve dhe përforcimin e bashkëpunimit ndërmjet autoriteteve të dy shteteve në luftën kundër krimit të organizuar.
