Policia e Beratit ka vënë në pranga 29-vjeçarin D. A., i cili ishte shpallur në kërkim që prej nëntorit 2024, si pjesë e aktivitetit të paligjshëm për tregtimin e vajit të reklamuar si “bio”, por që rezultonte me cilësi të ulët.
29-vjeçari ishte përfshirë në skemën e mashtrimit së bashku me babanë e tij, një 56-vjeçar nga fshati Tapi i Kuçovës, i arrestuar më parë. Babë e bir akuzohen për veprat penale “Fshehja e të ardhurave” dhe “Mashtrimi me produktet ushqimore”, të kryera në bashkëpunim.
Arrestimi i fundit u krye këtë të shtunë, më 18 janar 2025, si pjesë e operacionit të koduar “Oil”.
Denoncimi fillestar erdhi nga gazetarët e një emisioni investigativ, të cilët zbuluan se familja kishte përshtatur një ambient në banesë për përzierjen e vajrave dhe produkteve të panjohura. Produktet reklamoheshin dhe shiteshin si “Vaj Ulliri Bio Jugu”.
Hetimet vazhdojnë për të zbuluar të gjithë zinxhirin e shpërndarjes dhe përfshirjet e mundshme në këtë aktivitet mashtrues.
