Pas sherrit që ndodhi në Ksamil, ku 26-vjeçari goditi me grusht punonjësin e policisë, nga hetimet e kryera autoritetet procedojnë penalisht edhe vëllain e tij. Vëllai i Lilo Merës, 30 vjeç, ushtronte pa licencë aktivitetin e këmbimit valutor si dhe nuk lëshonte kuponë tatimor.
Efektivët bëjnë me dije se 30-vjeçarit iu sekuestrua një shumë parash në lekë, euro dhe paund, si dhe 2 laptopë.
Ndërsa vëllai i tij, Lilo Mera u arrestua pas një incidenti që pati me dy punonjës të Qarkullimit Rrugor i cili i kundërshtoi dhunshëm për vendosjen e një gjobe për parkim të gabuar.
“Ushtronte pa licencë aktivitetin e këmbimit valutor dhe nuk lëshonte kuponë tatimor, si dhe kishte punonjës të pasiguruar, procedohet penalisht 30-vjeçari në Ksamil. Sekuestrohen një shumë parash në lekë, euro dhe paund, si dhe 2 laptopë.
Gjatë veprimeve të kryera për zbardhjen e ngjarjes së ndodhur më datë 17.08.2024 në Ksamil, ku një 26-vjeçar u vu në pranga nga Oficerët e Policisë Gjyqësore pranë Prokurorisë Sarandë, pasi kundërshtoi me dhunë punonjësit e qarkullimit rrugor të Sarandës gjatë ushtrimit të detyrës për plotësimin e procesverbalit të shkeljes rrugore (parkim i gabuar), konkretisht në rrugën “Butrinti”, përballë një subjekti privat në administrimin e vëllait të 26-vjeçarit, shërbimet e Komisariatit të Policisë Sarandë, falë bashkëpunimit me qytetarët, kanë marrë informacion se në këtë subjekt ushtrohej aktiviteti i këmbimit valutor pa licencë.
Menjëherë në këtë subjekt është kryer kontroll dhe është konstatuar se shtetasi D. M., administrator i këtij subjekti, ushtronte pa licencë aktivitetin e këmbimit valutor dhe nuk lëshonte kuponë tatimor për shërbimet e ofruara, si dhe kishte punonjës të pasiguruar. Në vijim të veprimeve procedurale, Seksioni për Hetimin e Krimit Ekonomik e Financiar referoi materiale në Prokurori dhe nisi procedimin penal për shtetasin D. M., 30 vjeç, banues në Ksamil.
Në cilësinë e provës materiale u sekuestruan 98 896 lekë, 368 euro, 26 paund dhe 2 laptopë. Materialet i kaluan Prokurorisë për veprime të mëtejshme hetimore”, njofton policia.
