Një sherr ka ndodhur ditën e sotme pranë qendrës së Tiranës mes disa refugjatëve arabë të cilët janë tranzit në Shqipëri.
Policia ka bërë me dije se një 21-vjeçar palestinez, ka plagosur me thikë një 17-vjeçar maroken pas një sherri për motive të dobëta.
Mësohet se sherri ka ndodhur pranë bulevardit “Bajram Curri” dhe pas konfliktit policia ka shoqëruar 21-vjeçarin palestinez me inicialet I.H në komisariatin Nr.3.
Ndërkohë adoleshenti maroken është dërguar në spital ku po merr edhe trajtimin mjekësor.
Njoftimi i Policisë:
Sipas Policisë, specialistët për Hetimin e Krimit në Komisariatin e Policisë Nr. 3 bënë arrestimin në flagrancë të shtetasit palestinez me inicialet I. H., 21 vjeç, pasi në bulevardin “Bajram Curri”, pas një konflikti për motive të dobëta, ka plagosur me mjet prerës (thikë), një shtetas të mitur 17-vjeçar (maroken).
Materialet i kaluan Prokurorisë së Rrethit Gjyqësor Tiranë, për veprime të mëtejshme.
