Një konflikt i çastit mes komshijve në qytetin e Pogradecit ka përfunduar me një të plagosur.
Mësohet se ngjarja ndodhi fshatin Zagorçan të Pogradecit, ku autori i ngjarjes Fatos Çoçka ka goditur me thikë fqinjin e tij Dorjan Rusi, duke i shkaktuar plagë serioze.
Rusi është dërguar me urgjencë drejt spitalit, ku po merr ndihmën e parë mjekësore por ende nuk dihet gjendja e tij shëndetësore.
Ndërkohë sipas informacioneve paraprake që NewsBomb ka siguruar mësohet se konflikti mes dy personave ka ndodhur për motive të dobëta, por pritet që në vijim të dalin detaje të reja. Mësohet se i plagosuri Rusi, pas sherrit i cili nisi në lokalin e fshatit, është larguar drejt shtëpisë për ta evituar zënkën, por Çoçka e ka ndjekur dhe e ka qëlluar nga pas.
Ndërkohë policia dhe grupi hetimor kanë shkuar në vendin e ngjarjes dhe po punojnë për zbardhjen e plotë të rrethanave të ngjarjes.
Njoftimi i policisë:
Plagosi me mjet prerës një shtetas gjatë një konflikti për motive të dobëta, por falë reagimit në kohë të Policisë kapet dhe arrestohet menjëherë autori i dyshuar.
Më datë 24.08.2020, rreth orës 16:45, është marrë njoftim se në fshatin Zagorçan, gjatë një konflikti për motive të dobëta shtetasi F. Ç., banues në këtë fshat, kishte dëmtuar me mjet prerës shtetasin D. R., rreth 30 vjeç, i cili aktualisht ndodhet në Spitalin e Pogradecit nën kujdesin e mjekëve.
Shërbimet e Policisë, falë vlerësimit në kohë të informacionit dhe reagimit të shpejtë, bënë të mundur kapjen dhe arrestimin në flagrancë të autorit të dyshuar, i cili po shoqërohet në ambientet e Komisariatit për veprime të mëtejshme proceduriale.
Grupi hetimor po punon për zbardhjen e plotë të rrethanave të kësaj ngjarje.
