Pas një njoftimi për konflikt në lagjen “Manush Alimani”, shërbimet e Policisë Shkodër ndërhynë menjëherë për të parandaluar përshkallëzimin e situatës.
Në kuadër të operacionit të koduar “Reagimi”, u arrestua në flagrancë 54-vjeçari V. H., banues në Shkodër, për veprat penale “Mbajtja pa leje e armëve dhe municionit” dhe “Kanosje”.
Ky shtetas, pas një konflikti me pronarin e një lokali, G. H., 36 vjeç, ishte larguar, por më pas ishte rikthyer i armatosur me një kallashnikov.
Në momentin e kthimit, në vendngjarje mbërritën shërbimet e Policisë, të cilat ndërhynë për ta neutralizuar. Në pamundësi për t’u larguar, ai hodhi armën në tokë dhe u arrestua, ndërsa arma dhe municioni u sekuestruan si prova materiale.
Ndërkohë, 36-vjeçari G. H. u procedua në gjendje të lirë për veprat penale “Punësimi i paligjshëm” dhe “Fshehja e të ardhurave”.
