Shembja e Teatrit Kombëtar ditën e djeshme, nxiti protesta masive nga qytetarët, artistët e personazhet e medias.
Shumë persona janë ndaluar nga efektivët e policisë, ku nuk përjashtohen edhe rastet e dhunës së paprecedentë.
Sipas informacioneve të publikuara nga vetë Policia e Shtetit, janë proceduar në gjendje të lirë për veprën penale “Pjesëmarrja në grumbullime të paligjshme”, 21 shtetas.
Për 36 persona të tjerë që ishin të shoqëruar në ambientet e komisariateve, u mor masë administrative në zbatim të Aktit Normativ për marrjen e masave të veçanta kufizuese, me qëllim parandalimin e përhapjes së COVID-19.
Policia e Shtetit apelon për organizatorët dhe pjesëmarrësit në tubim, se grumbullime të tilla janë në kundërshtim të plotë me ligjin dhe aktin normativ duke u shndërruar në një rrezik potencial për përhapjen e infeksionit COIVD-19, pasi Tirana është ende një zonë e kuqe në hartën epidemiologjike të vendit.
Sipas “Balkanweb”, shtatë personat që janë arrestuar nga policia ditën e djeshme janë: Bolken Abazi, Kastriot Qemaj, Sokol Ndoj, Romeo Lila, Endrit Mertiri, Burim Tafilica dhe Edjon Xhoxhaj janë të arrestuarit për kundërshtim të policëve dhe grumbullim të paligjshëm.
Mes tyre bie në sy dhe emri i kreut të Vetëvendosjes në Tiranë, Boiken Abazi.
