Sekretari i Përgjithshëm i Kombeve të Bashkuara, António Guterres do të takohet me presidentin ukrainas Volodymyr Zelensky të enjten, tha në një konferencë të mërkurën zëdhënësi i OKB-së Farhan Haq.
Guterres udhëtoi të mërkurën në mëngjes nga Polonia në Ukrainë dhe së fundi mbërriti në Kiev, ku do të takohet me Zelenskyy dhe ministrin e Jashtëm Dmytro Kuleba të enjten, tha Haq.
Sekretari i Përgjithshëm u prit nga presidenti polak Andrzej Duda të martën në mbrëmje në Poloni dhe e informoi atë për takimet e tij në Moskë dhe Ankara, tha gjithashtu Haq.
“Sekretari i Përgjithshëm shprehu vlerësimin dhe mirënjohjen e tij të thellë për Presidentin për bujarinë e popullit polak për mënyrën në të cilën ata hapën shtëpitë dhe zemrat e tyre për pothuajse dy milionë refugjatë ukrainas”, tha Haq.
Haq tha se takimi i së enjtes do të jetë “i përbashkët”, por nuk specifikoi se kush do t’i bashkohet Guterres në takimin me Zelenskyy dhe Kuleba. Haq gjithashtu nuk përmendi se në cilën orë të ditës do të zhvillohet takimi.
Gjithashtu pas nëntë ditë izolimi pasi rezultoi pozitiv me Covid-19, kryeministri italian Mario Draghi u kthye në detyrë mëngjesin e sotëm ku ka zhvilluar një bisedë telefonike me presidentin ukrainas Volodymyr Zelensky.
Sipas La Republica, Draghi ka biseduar me Zelenskyn për zhvillimet e fundit në Ukrainë dhe ndihmën që Italia do të ofrojë për vendin. Kryeministri, përsëriti mbështetjen e plotë të qeverisë italiane për autoritetet e Kievit dhe gatishmërinë e saj për të kontribuar në kërkimin e një zgjidhjeje të qëndrueshme të krizës.
Zelensky falënderoi Italinë për strehimin e mbi 100,000 ukrainasve që janë detyruar të largohen nga shtëpitë e tyre për shkak të agresionit rus. U diskutua gjithashtu përfshirja e Italisë në marrëveshjet e ardhshme të sigurisë të Ukrainës.
