Gjykata Kushtetuese i ka dhënë kohë për prova shtesë Presidencës në lidhje me çështjen e Teatrit Kombëtar. Mësohet se Kushtetuesja e ka vlerësuar si të arsyeshme që t’i japë më shumë kohë kërkuesit që në rastin konkret është Presidenca.
Brenda datës 8 qershor ora 12:00 duhet që të sillen dokumentet e listuar nga kërkuesi, ndërsa la afat datën 10 qershor për shpjegimet shtesë pasi të paraqiten dokumentet e reja.
Por nga ana tjetër Gjykata Kushtetuese nuk e ka vlerësuar thirrjen e dëshmitarëve në këtë proces. Kushtetuesja ka kërkuar që secila palë duhet të paraqitet me një ekspert që ka njohuri të posaçme për çështjen. Gjithashtu mësohet se seanca e radhës lidhur me çështjen e teatrit do të zhvillohet më 15 qershor 2021.
“Pati një rrëzim të kërkesës për dëshmitarë. Por nga ana tjetër gjykata vlerësoi dhe i dha mundësi palëve në proces të paraqiten me ekspertë të tyre të profesionalizuar për çështje të trashëgimisë kulturore. Kjo është një risi në këtë proces në Gjykatën Kushtetuese, i cili besojmë fort se do të risjellë drejtësinë kushtetuese në Shqipëri, në mbrojtje të vlerave të trashëgimisë kulturore kombëtare, të identitetit tonë kombëtar që për fat të keq u cenuar, por që mundet të rikuperohet dhe ka kohë tani”, deklaroi Bledar Dervishaj, përfaqësues ligjor i Presidentit.
