Kryedemokrati Lulim Basha, ka postuar mëngjesin e sotëm një tjetër dështim të qeverisë aktuale. Në kuadër të fushatës “100 dështimet e Ramës”, Basha ka postuar një video, duke kujtuar se nga zgjedhjet e 25 Prillit na ndajnë vetëm 31 ditë.
Kësaj radhe Basha foli për kostot marramendëse që qytetarët do të paguajnë për problematikat në hartimin e kontratave koncesionare.
Nuk janë pak por plot 240 milionë euro që do të paguhen nga taksat e shqiptarëve dhe do të shkojnë direkt në xhepat e miqve të Ramës.
Risku financiar që shteti ka marrë përsipër dëmton rëndë buxhetin e vendit, të cilin nuk e kemi luksin ta shpërdorojmë.
“31 ditë deri më 25 prill, 100 dështimet e Ramës në 8 vite. Cila është kostoja që qytetarët do të paguajnë për problematikat në hartimin e kontratave koncensionare, ku shteti ka marrë përsipër riskun financiar? Përgjigja 240 milionë euro.”, është shprehur kreu demokrat Basha.
Edhe dje lideri opozitar solli në vëmendje një tjetër çështje, atë të PPP-ve. Me anë të një “instastory” Basha thekson se sipas Kontrollit të Lartë të Shtetit koncesioni i “Check up-it” ka marrë 6 milionë euro për shërbime të pakryera.
Kujtojmë se Basha një pjesë të fushatës e ka zhvendosur në rrjetet sociale, duke synuar një target-grup më të ri.
Gjithashtu Basha ka zhvilluar shumë takime në qytete të ndryshme, ku në shumicën prej tyre takimet janë zhndërruar në mitingje elektorale.
Përmendim këtu Kavajën, Shkodrën, Gjirokastrën e sëfundmi dhe Beratin. Grumbuj qytetarësh pa maska e pa distancë sociale kanë bërë që këto takime të krijojnë rrezik të shtuar në kohë pandemie.
