Një sulm i rëndë ajror ka goditur gjatë natës kryeqytetin ukrainas, Kievin, duke shkaktuar viktima dhe dëme të mëdha materiale.
Të paktën gjashtë persona kanë humbur jetën dhe 23 të tjerë janë plagosur si pasojë e sulmeve me raketa dhe dronë të nisura nga forcat ruse. Mes të plagosurve ndodhen edhe një grua shtatzënë dhe një fëmijë.
Goditjet kanë shkaktuar zjarre në zona të banuara, kanë dëmtuar hyrjen e një stacioni metroje dhe kanë prekur një pallat 25-katësh.
Autoritetet vendase konfirmojnë se operacionet e kërkim-shpëtimit janë ende në vijim, me angazhimin e mbi 300 shpëtimtarëve dhe dhjetëra mjeteve të specializuara.
Komandanti i Përgjithshëm i Forcave të Armatosura të Ukrainës, Oleksandr Syrsky, ka reaguar me një deklaratë të ashpër, duke paralajmëruar se vendi i tij do të intensifikojë sulmet ndaj Rusisë.
“Nuk do të qëndrojmë pasivë. Ky qëndrim do të na çonte vetëm drejt humbjeve të reja në njerëz dhe territor,” tha ai.
Ndërkohë, përpjekjet diplomatike për t’i dhënë fund konfliktit duket se janë në ngërç. Bisedimet e fundit mes palëve janë zhvilluar rreth tre javë më parë dhe deri më tani nuk ka sinjale për rifillimin e tyre.
Kujtojmë se Rusia nisi pushtimin në shkallë të plotë të Ukrainës në shkurt të vitit 2022 dhe që prej atëherë, Kievi dhe qytete të tjera kanë qenë vazhdimisht objektivi i sulmeve masive nga ajri.
