Ministrja e Financave Delina Ibrahimi ka bërë të ditur këtë të enjte se është miratuar projektligji për rritjen e pagave për punonjësit e IT, mjekët, infermierët, policët, mësuesit etj. Ibrahimaj shpjegon separatë do të merren nga fondet e rritjes së të ardhurave dhe rialokimet e brendshme.
Kujtojmë se këto rritje pagash do bëhen gjatë fushatës elektorale për zgjedhjet lokale të 14 majit.
“Miratuam një projektligj të rëndësishëm, konkretisht është projektligji për kompetencat, përcaktimin e pagave, trajtimet e tjera financiare dhe përfitimeve të të punësuarve në administratën publike si dhe të pagës bazë minimale në shkallë vendi. Ky projektligj i hap rrugën disa kompetencave të qeverisë për të përcaktuar disa kategori pagash që janë diskutuar edhe më herët
Sot kemi filluar dhe miratuar disa projektvendime për rritjen e pagave për sektorin shëndetësor, arsimor dhe sigurisë, konkretisht për policinë e burgjeve, gardën dhe zjarrfikësit. Në zbatim të vendimit të marrë më parë, nga 1 prilli do të rriten edhe pagat e punonjësve mbështetës të administratës publike.
Kjo rritje do të jetë e ndarë në dy faza. Pra rriten me pagat e vitit 2023 ndërsa do të ketë rritje edhe në vitin 2024.
Kostoja vjetore e cila e plotë do të jetë për vitin 2025 e rritjes së pagave është në nivelin 38 miliard lekë.
Këto fonde janë parashikuar që të mblidhen qoftë nga rritja e të ardhurave, qoftë nga rialokime të brendshme. Pra janë kosto të cilat përballohen brenda kuadrit makrofiskal, duke ruajtur të gjithë parametrat e ligjit organik të buxhetit, që do të thotë që ne do të vijojmë të ulim borxhin dhe deficitin duke garantuar qëndrueshmëri fiskale.
Për vitin 2023 ne kishim parashikuar politikë të rritjes së pagave dhe kishte vlerë 2.4 miliardë lekë që prekte arsimin, shëndetësinë dhe IT. Rritja e pagave vjen edhe si pasojë e krizës inflacioniste, pra janë disa zëra të parashikuara në buxhetin 2023 që akomodojnë rritjen e pagave dhe koston shtesë të parashikuar për këtë vit”, u shpreh ajo.
