Në Shqipëri, rastet e të sëmurëve me diabet kanë pësuar një rritje të ndjeshme.
Sipas statistikave janë mbi 90 mijë individë të regjistruar aktualisht si diabetikë.
Kështu deklaron mjekja Luftime Bruka, duke shtuar se kjo sëmundje po prek gjithnjë e më shumë individë të moshave të reja dhe madje edhe fëmijë.
Sipas mjekes, faktorët kryesorë që kontribuojnë në përhapjen e diabetit janë stresi, jeta sedentare, dieta e pasigurt dhe mungesa e aktivitetit fizik.
“Kemi raste të shtuara të diabetit. Shkaqet stresi shkaku kryesor, jeta sedentare dhe kequshqyerja dhe mungesa e aktivitetit fizik. Kemi shfaqje të diabetit në mosha shumë të reja dhe në mosha pediatrike. Kequshqyerja dhe mënyra e jetesës janë shkaqet kryesore. Sot në Shqipëri numërohen mbi 90 mijë diabetikë”.
Bruka njofton se vetëm ajo si mjeke ka zbuluar 30 raste në muaj të diabetit. Ndërsa apelon për të bërë kontrolle të rregullta (check-up) për të gjithë ata që kanë të afërm me diabet, duke theksuar rëndësinë e diagnostikimit të hershëm.
Po ashtu, Bruka shpjegon simptomat kryesore të sëmundjes për t’i ndihmuar individët të identifikojnë shenjat e diabetit në fazat e para.
“Mund të zbuloj 30 raste në muaj vetëm unë si mjeke. Me check up janë zbuluar dhe raste të reja. Diabeti është sëmundje trashëguese. Simptomat tharje goje, pi shumë ujë, ka raste që shton në peshë, ose bie në peshë. Diabeti tip 1 shfaqet me rënie në peshë, diabeti tip dy jo. Duhet të kontrollohen sidomos ata që kanë të afërm me diabet çdo 3 muaj duhet të bëjnë check up”, tha mjekja Luftime Bruka.
