Tension, zemërim dhe frikë. Kjo është panorama në fshatin Çiflik të Bashkisë Dimal, ku banorët kanë dalë në protestë duke denoncuar bllokimin e kanaleve kulluese dhe rrezikun real që i gjithë fshati të përmbytet. Sipas tyre, situata është lënë në mëshirë të fatit, ndërsa institucionet jo vetëm që nuk ndërhyjnë, por po ushtrojnë presion të hapur që kanalet të mos zhbllokohen.
Banorët thonë se asnjë përfaqësues i bashkisë nuk ka shkuar në zonë për të marrë përgjegjësi apo për të dhënë zgjidhje, ndërkohë që uji grumbullohet dhe rreziku shtohet nga ora në orë. Në vend të ndërhyrjes, sipas tyre, në terren ndodhet policia për të penguar hapjen e kanaleve.
“Duam të hapet ura. Jemi të mbytur. I bëj thirrje kryeministrit të tërheqë policinë nga këtu. Ne po na bëhet presion… Këta të ndërhyjnë, ka qenë një portë këtu”, deklaroi një nga banorët mes protestës, duke e cilësuar situatën të papërballueshme.
Një tjetër qytetar ngriti alarmin se nëse nuk hapet menjëherë kanali, pasojat do të jenë katastrofike për të gjithë fshatin.
“Këtu ka qenë një portë. Rrinte policia këtu. Nuk më kanë lënë. Kanali është bllokuar dhe duhet hapur porta. Sepse është për shkarkim”, u shpreh ai, duke theksuar se çdo minutë vonesë rrit rrezikun e përmbytjes.
Zemërimi i banorëve shoqërohet edhe me akuza të rënda për korrupsion dhe neglizhencë. Një i moshuar, që thotë se jeton prej dekadash në këtë zonë, e përshkroi situatën si të paprecedentë.
“Këta janë kriminelë. I ka mbytu korrupsioni. Në asnjë vend të botës nuk mbyllen kanalet. Po bëj 80 vjeç, kurrë nuk jemi përmbytur. Kurrë nuk ka ardhur lumi… Ne sot do rrimë këtu sepse nëse ikim ata vijnë e bllokojnë”, deklaroi ai.
Banorët paralajmërojnë se nuk do të tërhiqen nga protesta dhe se do të qëndrojnë në vend për të mbrojtur fshatin e tyre, duke e cilësuar bllokimin e kanaleve një rrezik të drejtpërdrejtë për jetën dhe pronën e tyre, si dhe një tjetër shembull të neglizhencës dhe presionit institucional ndaj qytetarëve.
