Zjarri që përfshiu masivin pyjor të Darëzezës në Fier është riaktivizuar mesditën e sotme, duke shkaktuar përhapje të shpejtë të flakëve në një sipërfaqe të konsiderueshme, ndërkohë që ndërhyrja mbetet e vështirë për shkak të terrenit ranor.
Zjarri i djeshëm ishte neutralizuar në orët e para të mëngjesit, por vatrat u riaktivizuan pak orë më vonë, duke rikthyer emergjencën.
Në përpjekje për shuarjen e flakëve janë angazhuar forcat zjarrfikëse nga Fier, Patos dhe Roskovec, punonjës të shërbimit pyjor dhe banorë të zonës, të cilët janë detyruar të përdorin mjete rrethanore për shkak të pamundësisë së qasjes me automjete zjarrfikëse.
Bashkia Fier ka vendosur në dispozicion një traktor me zinxhir për të hapur korridore që ndihmojnë ndërhyrjen nga toka.
Në të njëjtën kohë, një tjetër vatër zjarri është aktivizuar në kodrat e Zhupanit, ku gjithashtu terreni i vështirë ka penguar përfshirjen e mjeteve zjarrfikëse në operacion.
Prefektura e Fierit ka kërkuar ndërhyrje nga ajri, ndërsa Ministria e Mbrojtjes ka konfirmuar praninë në terren të 7 mjeteve zjarrfikëse me 40 efektivë të MZSH, një buldozeri dhe një fadrome.
Megjithatë, përmasat që ka marrë zjarri dhe vështirësia e terrenit nuk kanë lejuar vendosjen e situatës nën kontroll.
Rreth orës 14:00, flakët janë intensifikuar dhe kanë avancuar më tej në pjesën veriore të pyllit, duke bërë të pamundur ndërhyrjen nga toka.
Në bashkëpunim me Qendrën e Bashkuar Operacionale, në ndihmë është nisur një helikopter Cougar i Forcës Ajrore për ndërhyrje ajrore.
Deri tani, zjarri ka përfshirë rreth 10 hektarë sipërfaqe pyjore, ndërsa era vazhdon të ndihmojë përhapjen e flakëve, duke e bërë situatën të vështirë për t’u menaxhuar.
