Plani i rindërtimit të banesave të dëmtuara nga tërmeti në Bubq ka prekur dhe familjen Xhaferri. Shtëpia e tyre trekatëshe duhet të shembet pasi ashtu është parashikuar nga urbanistika. Familjarët kanë bërë rezistencë pasi mendojnë se nuk ka pse të shembet shtëpia e tyre, që siç shpreh ata, nuk prish projektin e qeverisë.
Ata pretendojnë se nuk ka marrë dëmshpërblim për godinën, kurse lidhur me shembjen janë njoftuar me shkrim. Pas rezistencës së familjarëve policia ka shoqëruar disa pjesëtarë, ndërsa banesa është boshatisur nga pajisjet dhe orenditë.
Në godinën e familjes, janë të vendosura kopshti dhe qendra shëndetësore e fshatit Bubq, një shoqatë dhe disa biznese. Si pasojë e planit të rindërtimit do të shemben dy banesa dhe dy godina shërbimi 1 deri 3 kate. Njëri prej familjarëve deklaroi se do ta çojë ankesën në gjykatë.
“Si botohet, si u merrka vesh shteti me qytetarin. Brenda 24 orëve më bini fadromën. Unë jam pronari i kësaj vile. Të dali kryeministri vetë e të thotë ku e pengon kjo ndërtesë një plan ndërtimi me 18 hektar. Ai të presë vetëm vendimin e gjykatës. Unë pres një vendim gjykate. Ky objekt bazohet në 500 m katror ndërtim. Shteti të më japë një kohë të shkurtër që të drejtohem në gjykatë. Si mund të sjellësh t’i fadromën, unë kam fëmijët aty. Do të sjell edhe vërtetimin e fëmijës që e kam nxjerrë nga spitali para dy ditësh”, pronari i objektit.
/GazetaReforma.com/
