Instituti Kombëtar i Shëndetësisë Publike të Kosovës (IKSHPK) ka konfirmuar rastin e parë me Mpox (linë e majmunëve) në vend.
I infektuari është një shtetas kosovar 30-vjeçar, i cili ishte kthyer nga Afrika Perëndimore dhe shfaqte simptoma të tilla si temperaturë, ethe, ndryshime në lëkurë, sidomos në fytyrë dhe duar, si dhe kruarje.
Ai u hospitalizua më 24 dhjetor në Klinikën Infektive të Qendrës Klinike Universitare të Kosovës, ku aktualisht gjendet në gjendje stabile shëndetësore.
IKSHPK ka gjurmuar të gjitha kontaktet e infektuarit dhe ka dhënë rekomandime për masat e parandalimit dhe kontrollit të infeksionit për familjarët dhe ata që mund të kenë pasur kontakt me të.
Instituti ka theksuar se shpesh herë, Mpox shkakton simptoma të lehta ose mesatare, që zgjasin dy deri në katër javë. Sëmundja përhapet përmes kontaktit të ngushtë dhe zakonisht shoqërohet me simptoma të ngjashme me gripin dhe puçrra të mbushura me qelb.
Në gusht, Organizata Botërore e Shëndetësisë (OBSH) shpalli linë e majmunëve si emergjencë globale për shëndetin publik, duke hapur mundësinë për ndihma dhe masa ndërkombëtare për të frenuar përhapjen e saj.
IKSHPK ka bërë thirrje për kujdes dhe ndërgjegjësim për këtë sëmundje.
