Në Zyrën e BE-së në Kosovë janë marrë tri letra lidhur me sulmin terrorist të 24 shtatorit në Banjskë të Zveçanit.
Kosova ka kërkuar dorëzimin e kryeterroristit serb, Milan Radoiçiq, ndërsa Serbia kërkon dokumentacionin e plotë për këtë rast.
Në fillim të korrikut, Zyra e BE-së mori një kërkesë nga Serbia për ndihmë juridike në lidhje me rastin e 24 shtatorit.
Po ashtu, autoritetet e Kosovës kërkuan ndihmë nga Bosnja dhe Hercegovina për armët e përdorura në sulmin terrorist.
Në tetor, Kosova kërkoi gjithashtu dorëzimin e Radoiçiqit, por deri tani nuk ka marrë përgjigje nga Serbia. Zyra e BE-së shpreson për bashkëpunim të plotë nga Serbia në këtë çështje. Ministrja e Drejtësisë, Albulena Haxhiu, ka paralajmëruar refuzimin e kërkesës së Serbisë.
“Përfaqësuesit e BE-së në Kosovë, morën gjithashtu një kërkesë për ndihmë të ndërsjellë juridike nga autoritetet e Kosovës për autoritetet e Bosnjës dhe Hercegovinës në lidhje me rastin Banjska. Kërkesa ishte dërguar në Sarajevë dhe tashmë ishte marrë një përgjigje. Përgjigja u është transmetuar me kohë autoriteteve kompetente në Kosovë”.
“Për më tepër, Përfaqësuesit e Zyrës së BE-së në Kosovë, ka dërguar në tetor të vitit të kaluar një kërkesë për ndihmë të ndërsjellë juridike nga autoritetet e Kosovës tek autoritetet serbe për të njëjtën çështje. Ende nuk është marrë asnjë përgjigje nga autoritetet serbe. Ne presim që Serbia të bashkëpunojë plotësisht për këto kërkesa përmes kanalit të krijuar të ndihmës së ndërsjellë juridike. Qëllimi i këtij mekanizmi është të sigurojë bashkëpunimin gjyqësor ndërmjet Kosovës dhe vendeve që nuk e njohin atë, përfshirë Serbinë, dhe të lehtësojë qasjen në drejtësi për të gjithë, pavarësisht nga shtetësia apo vendbanimi i tyre”, thuhet nga zyra e BE-së në Kosovë.
