Ditën e sotme para seancës plenare, deputeti Pandeli Majko shtyu gazetaren para hyrjes në Parlament. Ky reagim erdhi si pasojë e pyetjes së gazetarës për vendimin e Ramës për listat e hapura dhe nëse ai rrezikohej të zgjidhej, por në nervozizëm e sipër deputeti shtyu gazetarën Eksiola Shehu, e cila është dhe shtatëzanë.
Ky precedent me gazetarët nga qeveria Rama nuk është rasti i parë, kujtojmë këtu dhe rastin e kryeministrit Rama me gazetaren e Syri Tv, Ambrozia Meta. të cilën e shtyu pas kundërpërgjigjes së saj për projektin e Durrësit, ku gazetarja Meta i thotë se “aty nuk ka investim, por po shiten pallatet në gropë”.
“Shko shifi”, i përgjigjet Rama, teksa zgjat dorën e djathtë në fytyrën e gazetares dhe e shtyn, duke u larguar.
“Ju lutem mos më prekni më”, i drejtohet gazetarja Ambrozia Meta.
Këto sjellje jo etike janë bërë që në momentin e parë kur kryeministri Rama ka ardhur në pushtet, duke i cilësuar mediat dhe gazetarët kazan mediatik e në këtë mënyrë duke i zhvlerësuar statusin dhe punën sublime që mediat dhe gazetarët bëjnë si pushtet i katërt.
