Kryeministri Edi Rama në një intervistë për prestigjozen gjermane Der Spiegel, ka shpjeguar situatën e tensioneve të shkaktuara në kampin e muxhahedinëve në Manzë të Durrësit.
Rama është shprehur se Shqipëria i ka strehuar anëtarët e opozitës iraniane, por muxhahedinët nuk mund ta përdorin Shqipërinë për të luftuar kundër regjimit iranian. Rama thekson se muxhahedinët e kanë shkelur disa herë marrëveshjen me shtetin Shqiptar.
“MEK-un e kemi prej disa vitesh në vendin tonë. Ata janë të mirëpritur, por me kusht që mos ta përdorin Shqipërinë si një platformë për operacionet e tyre politike. Mysafirët tanë iranianë e kanë shkelur vazhdimisht këtë marrëveshje. Shqipëria nuk ka synim të jetë në luftë me regjimin iranian. Shqipëria nuk pranon askënd që ka abuzuar me mikpritjen tonë”, tha Rama.
Pjesë nga intervista:
Spiegel: Pse pranuat me kërkesë të presidentit amerikan Barack Obama në vitin 2016 për të pranuar mijëra muxhahedinë?
Rama: Ishte një operacion jetëshpëtues. Ne hapëm dyert tona sepse grupi, që atëherë vepronte nga Iraku u ndoq sistematikisht. Dhe nëse një mik si SHBA-ja na kërkon diçka, ne ndihemi të nderuar.
SPIEGEL: Nëse do të ishit MEK do preferonit të largoheshit?
Rama: E kuptojmë inatin kundër regjimit në vendin e tyre. Por vendi ynë të përdoret si llogore në një luftë që nuk është e jona, nuk funksionon! Sigurisht që ata kanë çdo të drejtë të luftojnë për lirinë e tyre, por për ta bërë këtë duhet të largohen nga Shqipëria.
