Qafë-Plloça është bërë e rrezikshme të kalohet për shkak të ngricës. Në vend që të zhbllokojnë rrugën dhe t’i hedhin kripë, ministrja e Infrastrukturës, Belinda Balluku dhe drejtori i Autoritetit Rrugor, Egys Verdho njoftojnë që “kini kujdes se aty ka ngricë”.
“5 mijë ton depozita kripe dhe në varësi të punës ato vijnë dhe shtohen për çdo rast emergjence”, tha Verdho. Po të ishte hedhur kripë nuk do të ngrinte.
Jo vetëm që nuk bëjnë punën e tyre që t’u heqin veshin kontraktorëve, këta dy zyrtarë bëjnë zëdhënësin e privatëve duke mburrur aftësitë e tyre. Kapacitet janë më të mëdha, bëri me dije ministrja e Infrastrukturës, Belinda Balluku gjatë një inspektimi në segmentin e Qafë Plloçës së bashku me Drejtorin e ARRSH, Ergys Verdho.
“1200 punonjës janë në gatishmëri, ndërkohë aktualisht 1000 po punojnë, automjetet kemi kapacitet 500, aktualisht janë në 350 janë në punë”, tha Ministrja.
Balluku ka bërë edhe një panoramim të situatës së rrugëve në vendin tonë aktualisht, teksa ka pasur një apel për drejtuesit e mjeteve që të respektojnë të gjitha kushtet e sigurisë.
“Në Qafë Plloçë dhe Qafë Thanë, rruga ka ngrirë, ne vazhdojmë i kontrollojmë, hedhim kripën, megjithatë automjetet duhet të tregojnë kujdes. Zona e Korçës, sot kanë reshje dëbore gjatë gjithë natës, më pas kemi mot të mirë që mund të përkthehet në ngrica, jemi në gatishmëri.
Në veri situata ka qenë më e mirë, pasi kemi parë Razmën, Koplikun që i kemi nën kontroll, nuk ka pasur reshje të reja, kontaktorët janë në gatishmëri. Vazhdojmë punën në zonën e Thethit, edhe pse nuk është një aks nacional, por i përket bashkive, por e kuptojnë këtë, së bashku me ushtrinë po bëjmë të mundur hapjen e rrugës. Kontratat janë bërë . Kemi reshje dëbore dhe në Llogara, duhet pasur kujdes pasi shumë nga automjetet mund të lëvizin, për shkak të fundjavës, dëborës, por duhet të plotësohen të gjitha kushtet e sigurisë së automjeteve”, tha Balluku.
/Gazetareforma.com/
