Një ngjarje tragjike është regjistruar paraditen e sotme në Shkodër, ku një punonjës i një kompanie interneti ka humbur jetën gjatë punës.
Sipas njoftimit të policisë, rreth orës 10:25, në lagjen “Salo Halili”, shtetasi A. F., 38 vjeç, dyshohet se ka rënë në kontakt me energjinë elektrike teksa po punonte në një shtyllë për riparimin e një kablli interneti. Për pasojë, ai ka humbur jetën në vendngjarje.
Në vend kanë mbërritur menjëherë shërbimet e policisë dhe të ambulancës, ndërsa grupi hetimor po punon për të sqaruar plotësisht rrethanat e këtij incidenti tragjik.
