Sot, në përkujtim të dymujorit të ndarjes nga jeta të Martin Canit, është zhvilluar protesta e gjashtë pranë shkollës “Fan Noli”, aty ku ndodhi ngjarja tragjike, ku 14-vjeçari u godit me thikë nga një bashkëmoshatar.
Gjatë protestës, ishin të pranishëm edhe prindërit e Martinit, të cilët shprehën shqetësimin se ende nuk është bërë drejtësi për vrasjen e djalit të tyre.
“Kemi dy muaj që përjetojmë këtë dramë të madhe dhe nuk kemi asnjë reagim nga institucionet. Iu bëj thirrje të gjithë prindërve që të bashkohemi, pasi fëmijët janë mbi gjithçka. Nuk flemë gjumë, po përjetojmë një ngjarje tragjike, kemi një traumë tepër të madhe. Na ka kapur frika, iu bëj thirrjeve institucioneve që të na dëgjojnë. Heshtja vret.” tha babai i Martin Canit.
Të njëjtën gjë deklaroi edhe nëna e 14 vjeçarit të ndjerë.
“Kërkoj vetëm drejtësi. Askush nuk më ka kontaktuar. Mesazhet e mia i kam bërë publike dhe dua vetëm drejtësi.”
Protestuesit kërkuan zbardhjen e ngjarjes dhe dënimin e autorëve, duke thirrur “Ende nuk ka drejtësi për Martinin” dhe ndezur qirinj në përkujtim të tij.
Pasi qëndruan aty, protestuesit, së bashku me prindërit e Martinit, marshuan nga shkolla drejt Ministrisë së Arsimit, duke thirrur “Drejtësi për Martinin”.
Vrasja e Martin Canit ndodhi më 18 nëntor 2024, pas një përleshjeje pranë shkollës “Fan Noli”, ku autori 14-vjeçar i goditi me thikë Martinin, duke shkaktuar vdekjen e tij dhe plagosjen e shokut të tij.
Ky i fundit ka pretenduar se autori nuk ishte i vetmi që mbante thikë, por policia ka mohuar këto pretendime. Gjykata e Tiranës caktoi arrest me burg për 14-vjeçarin më 22 nëntor, dhe ai u transferua në Burgun e të Miturve në Kavajë më 26 nëntor.
