Ambasada amerikane në Shqipëri ka reaguar sot një ditë pas protestës së zhvilluar në Tiranë, kundër vrasjes së 25-vjeçarit Klodian Rasha, nga policia.
Në një njoftim në faqen e saj zyrtare, ambasada e SHBA-ve ka bërë vetëm një lajmërim për qytetarët e saj në vendin tonë që të kenë kujdes dhe të shmangin tubimet e mëdha, pasi demonstratat mund të përhapen edhe në zonat e tjera të vendit.
Ambasada amerikane, nuk ka mbajtur asnjë qëndrim tjetër pro ose kundër protestës apo ngjarjes së vrasjes së të riut 25-vjeçar nga policia, duke qëndruar e ftohtë përball këtij rasti.
Ja reagimi i Ambasadës së SHBA-ve:
“Ambasada ka marrë raporte për protestën që ndodhi përpara zyrave qeveritare në Bulevardin “Dëshmorët e Kombit”, në Tiranë.
Raportet tregojnë se disa protestues kanë hedhur objekte në drejtim të policisë dhe disa efektivë u plagosën.
Efektivët e policisë kanë përdorur gaz lotsjellës për të kontrolluar turmën. Qytetarët amerikanë duhet të shmangin tubimet e mëdha, pasi demonstrata të ngjashme mund të përhapen në zona të tjera.
Personeli i ambasadës amerikane dhe anëtarët e familjes janë këshilluar të shmangin të gjithë vendet, ku demonstratat janë të vazhdueshme”,– thuhet në njoftimin e ambasadës.
/GazetaReforma.com/
