Situata e mbetjeve në qytetin e Durrësit është bërë problem tashmë prej javësh ndërsa për të përfunduar me një zgjidhje, qeveria ka vendosur sot që të ofrojë mbështetjen financiare të nevojshme.
Këshilli i Ministrave e ka marrë vendimin në ditën e fundit të marrëveshjes mes Bashkisë së Durrësit dhe kompanisë koncesionare që operon edhe në landfillin e Sharrës. Në vendimin e firmosur nga zv-kryeministri Erion Braçe, qeveria kërkon një zgjidhje të menjëhershme të problemit për menaxhimin/trajtimin e mbjetjeve urbane në këtë qark, duke mbajtur në konsideratë legjislacionin në fuqi në fushën e mbetjeve.
Problem me plehrat në Durrës u rëndua në fund të muajit qershor, ku Bashkia u gjet përballë presionit kompania vendosi që të zgjaste afatin e grumbullimit të plehrave pa pagesë, duke i rikujtuar bashkisë kushtet e marrëveshjes. Diçka të tillë kompania e mori përsipër deri në 15 korrik., ndërsa pas kësaj date Bashkia e Durrësit duhet të marrë masat pasi depozitimi i mbetjeve nuk do të lejohet.
Ky problem ka nisur që dy vite më parë kur kontrata me koncesionarin përfundoi dhe Bashkia kërkoi që të zgjatej edhe me 14 vite të tjera, me financim nga buxheti i shtetit. Një marrëveshje e re nuk është firmosur ende, ndërsa Porto Romano nuk është më një vend ku Bashkia e Durrësit mund të depozitojë mbetjet pasi është marrë nga qeveria.
Vendimi:
VENDIM PËR MBËSHTETJEN FINANCIARE PËR MENAXHIMIN E MBETJEVE NË BASHKITË E QARKUT TË DURRËSIT
Në mbështetje të nenit 100 të Kushtetutës, të ligjit nr.10431, datë 9.7.2011, “Për mbrojtjen e mjedisit”, të ndryshuar, të ligjit nr.10463, datë 22.9.2011, “Për menaxhimin e integruar të mbetjeve”, të ndryshuar, të neneve 10 e 22, pika 3, të ligjit nr.139/2015, “Për vetëqeverisjen vendore”, të ndryshuar, të shkronjës “b”, të pikës 1, të nenit 28, të ligjit nr.68/2017, “Për financat e vetëqeverisjes vendore”, dhe të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit të Turizmit dhe Mjedisit dhe të ministrit të Financave dhe Ekonominë, Këshilli i Ministrave
V E N D O S I:
- Bashkitë e Qarkut të Durrësit të marrin masa të menjëhershme për gjetjen e zgjidhjeve për menaxhimin/trajtimin e mbjetjeve urbane në këtë qark, duke mbajtur në konsideratë legjislacionin në fuqi në fushën e mbetjeve.
- Pas studimit të tregut dhe gjetjes së zgjidhjeve më të mira financiare për trajtimin e mbetjeve urbane, në përputhje me standardet e menaxhimit të integruar të mbetjeve, nëse efektet financiare të zgjidhjes janë të pamjaftueshme për t’u përballuar nga buxheti i bashkisë përkatëse të Qarkut të Durrësit, bashkia i drejtohet ministrisë përgjegjëse për financat, me qëllim mbulimin e diferencës së efekteve financiare të kërkuara.
- Pas dërgimit të kërkesës financiare, ministritë propozuese të këtij akti i propozojnë Këshillit të Ministrave miratimin e mbështetjes financiare për bashkitë e përfshira në Qarkun e Durrësit, në përputhje me instrumentet e parashikuara në legjislacionin në fuqi.
- Ngarkohen Ministria e Financave dhe Ekonomisë, Ministria e Turizmit dhe Mjedisit, bashkitë e Qarkut të Durrësit, këshilli i qarkut përkatës dhe prefekti i Qarkut Durrës për zbatimin e këtij vendimi.
Ky vendim hyn në fuqi me botimin në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
