Presidenti turk, Rexhep Tajip Erdogan, ka kritikuar Bashkimin Evropian për politikat e disa vendeve dhe institucioneve në lidhje me konfliktin në Gaza, duke thënë se ato kanë “lëkundur besimin” në vlerat evropiane. raporton CNN.
“Politikat e zbatuara nga disa institucione dhe vende evropiane gjatë luftës në Gaza kanë tronditur besimin në vlerat evropiane,” tha ai në një mesazh dërguar BE-së me rastin e Ditës së Evropës.
Erdogan theksoi se problemet e pazgjidhura do të vazhdojnë të sfidojnë vlerat evropiane: “Për sa kohë që krizat, konfliktet dhe luftërat që prekin Evropën dhe gjeografinë tonë të përbashkët mbeten të pazgjidhura, vënia në pikëpyetje e këtyre vlerave nuk do të ndalojë së intensifikuari.”
Presidenti turk paralajmëroi gjithashtu për kërcënimet ndaj rendit në Evropë: “Luftërat, konfliktet, aktet e terrorizmit, migrimi i parregullt dhe ndryshimet klimatike (…) kërcënojnë rendin në kontinentin evropian.”
Ai kritikoi rritjen e islamofobisë, ksenofobisë dhe racizmit, duke e cilësuar këtë si një nga shqetësimet kryesore për qytetarët dhe emigrantët që jetojnë në Evropë. Erdogan denoncoi “krimet e diskriminimit dhe urrejtjes kundër komunitetit turk në Evropë, të cilat janë bërë në mënyrë sistematike.”
Duke theksuar nevojën për bashkëpunim më të mirë, Erdogan tha se ka ardhur koha që BE-ja dhe Turqia të “zhvillojnë bashkëpunimin e tyre në të gjitha fushat, përfshirë negociatat e anëtarësimit.”
Turqia është një vend kandidat për anëtarësim në BE që nga viti 1999, por negociatat janë ngrirë që nga viti 2018.
Presidenti turk përfundoi me një paralajmërim të qartë: “Kundër politikave të përjashtimit ndaj vendit tonë (…), Turqia nuk do të përmbahet nga përdorimi dhe zhvillimi i mundësive dhe aftësive të saj strategjike.”
