Politika shqiptare ndodhet në prag të një krize të re, pas vendimit të kryeministrit Edi Rama për të pranuar hapjen e listave të kandidatëve për deputetë dhe, për më tepër, për ndalimin e koalicioneve parazgjedhore.
Në këto kushte, lëvizjet janë shtuar edhe nga Ambasada Amerikane në Tiranë. Ambasadorja Yuri Kim ka mbërritur në zyrën e Presidentit Ilir Meta, ku po zhvillon një takim. Detaje nga temat e diskutimit nuk janë bërë me dije, por pritet që në fokus të jenë marrëveshjet e mazhorancës me dy opozitat.
Dje, Yuri Kim u takua edhe me kryeministrin Edi Rama për të biseduar mbi marrëveshjen e 5 qershorit për kodin zgjedhor.
Partia Socialiste firmosi edhe një marrëveshje me opozitën parlamentare, e cila është parashikuar të votohet në Kuvend më 30 korrik, dhe që lidhet me listat dhe koalicionet, por që për PD dhe LSI do të thotë zhbërje e marrëveshjes së 5 qershorit.
