Gjykata e Tiranës ka hapur zyrtarisht procesin penal ndaj Bledar Jambellit, i cili akuzohet si porositësi i vrasjes së ish-drejtorit të policisë së Vlorës, Artan Cuku, ngjarje që ndodhi në vitin 2017 në rrugën e “Kosovarëve” në kryeqytet.
Seanca e sotme u zhvillua në mungesë të të pandehurit, ku Prokuroria paraqiti konkluzionet mbi akuzat ndaj Jambellit.
Gjykata caktoi datën 3 qershor, ora 13:30, për dhënien e pretencës nga Prokuroria, e ndjekur më pas nga paraqitja e mbrojtjes. Pas dëgjimit të të dyja palëve, trupa gjykuese pritet të shpallë vendimin përfundimtar.
Bledar Jambelli u arrestua fillimisht në Greqi në vitin 2018, por autoritetet helene refuzuan ekstradimin në Shqipëri dhe e liruan. Ai u ndalua sërish në Athinë në vitin 2022, në lidhje me një tjetër ngjarje të rëndë, ku u plagosën pesë persona.
Sipas hetimeve, porositja e vrasjes së Cukut lidhej me një ngjarje të mëparshme në vitin 2012, kur ish-kryekomisari Cuku kishte urdhëruar arrestimin e Jambellit si të dyshuar për vrasjen e Armando Delajt.
Dy vite më vonë, Jambelli u lirua dhe përfitoi edhe dëmshpërblim nga shteti shqiptar për ndalimin e padrejtë.
Për zbardhjen e atentatit të bujshëm ndihmoi bashkëpunimi i Mikel Shallarit, i arrestuar pak ditë pas ngjarjes si autori ekzekutues.
Shallari pranoi para Prokurorisë se kishte vepruar me porosi të Jambellit dhe në këmbim kishte marrë shpërblim financiar.
Për shkak të bashkëpunimit me drejtësinë, ai u dënua vetëm me 8 vite burg.
