Nuk janë të paktat rastet kur personat me aftësi të kufizuar kanë dalë në protestë për kauza të ndryshme. Jo rrallë herë ata kanë shprehur zhgënjimin e tyre ndaj institucioneve për mos realizimin e kushteve dhe të drejtave të tyre. Këtë të hënë ata kanë dalë këtë të hënë në protestë në qytetin e Pogradecit. Protesta u zhvillua në afërsi të bashkisë së Pogradecit ndërsa shkaku ka qenë indeksi i pagave që ata nuk i kanë marrë prej një periudhe 1-vjeçare.
Sipas tyre ata kanë fituar të drejtën për shlyerjen e lekëve të prapambetura me vendim te formës së prerë në datë 21.12.2020, por edhe në këto kushte problemi i tyre nuk është zgjidhur.
Vështirësia e personave me aftësi të kufizuara shkon përtej pagesës mujore që u takon të marrin.
Ata vuajnë jetesën sociale, ilaçet dhe shërbime të tjera.
Pas protestës ka ardhur edhe reagimi i bashkisë së Pogradecit të cilët bëjnë të ditur se pas një bashkëbisedimi me Ministrinë e Financave pritet te arrihet një zgjidhje përfundimtare pasi është kjo e fundit ajo që do të çele fondet.
Gjithsej janë rreth 200 persona me aftësi të kufizuara në bashkinë e Pogradecit që nuk kanë marr pagat shumat e të cilave ndahen sipas kategorive specifike. Ata kërkojnë të drejtën themelore për një jetë më dinjitoze. Kërkesat prioritare të aktivistëve janë rritja e shumës që ata marrin si ndihmë për aftësinë e kufizuar dhe si ndihmë e veçantë për fëmijë, krijimi i një regjistri për personat me aftësi të kufizuara dhe hapja e më shumë qendrave të kujdesit ditor dhe qendrave të rehabilitimit.
