Ministri i Mbrojtjes, Pirro Vengu, dhe gazetarja Klodiana Lala janë përplasur në emisionin Të Paekspozuarit në MCN TV, teksa diskutonin për situatën e krijuar nga përmbytjet.
Gjatë debatit, Lala e pyeti ministrin nëse funksionimi i hidrovoreve do ta kishte ndryshuar situatën, duke iu referuar konkretisht problematikave të raportuara në Durrës. Vengu u përgjigj se nuk ishte momenti për debat politik, duke theksuar se strukturat janë në terren dhe se prioritet mbetet menaxhimi i situatës.
Gazetarja këmbënguli se angazhimi i ministrit është detyrim institucional dhe se shmangia e përgjegjësisë nuk ndihmon. Vengu reagoi duke deklaruar se është pranë qytetarëve të prekur dhe kërkoi mirëkuptim për t’u rikthyer në terren, ndërsa Lala e cilësoi këtë si shmangie. Debati u fokusua edhe te hetimi i Prokurorisë së Durrësit lidhur me funksionimin e hidrovoreve dhe pastrimin e kanaleve.
Pjesë nga debati
Klodiana Lala: Nuk e nisët fjalën tuaj me një mesazh ngushëllimi për të ndjerin.
Pirro Vengu: E kam bërë në mënyrë të përsëritur sot, do të kërkoja mirëkuptimin tuaj.
Klodiana Lala: Prokuroria e Durrësit ka nisur hetim për tre vepra penale. Ndër të tjera, thuhet se dyshimet janë që hidrovori i Porto Romanos nuk ka funksionuar si duhet dhe ka patur problematika për pastrimin e kanaleve dhe plehrave. Ndiheni ju dhe qeverisja, përgjegjëse për këtë situatë? Po të kishte punuar hidrovori sic duhet, të ishin larguar mbeturinat, të largoheshin në inceneratorin që nuk ekziston, a do të ishte situate ndryshe?
Pirro Vengu: E nderuara zonjë, debati politik në këto momente nuk ndihmon, sidomos në përballimin e situatës së përmbytjes. Strukturat janë në terren. Çdo aktor që kërkon të kontribuojë….
Klodiana Lala: Ju e keni detyrim të angazhoheni.
Pirro Vengu: Politika pret, sot jemi me njerëzit dhe pranë tyre. Kërkoj mirëkuptimin tuaj të rikthehem në terren.
Klodiana Lala: Kjo është shmangie zoti ministër.
Pirro Vengu: Nuk u jam shmangur përgjegjësive të mia.
Klodiana Lala: Ka hetim që flet me fakte që hidrovori nuk ka funksionuar dhe ka shkaktuar pasoja.
Pirro Vengu: Sakrificën e forcave të armatosura duhet ta mbështesni.
Debati pasqyroi përplasjen mes kërkesës për përgjegjësi politike dhe theksimit të angazhimit operacional në terren, ndërsa hetimet për funksionimin e hidrovoreve dhe menaxhimin e infrastrukturës vijojnë.
