Lamtumira e Buffon ishte pothuajse zyrtare, por vetë portieri u kujdes për ta zyrtarizuar atë. Gianluigi Buffon do të largohet nga Juventus në fund të sezonit: “E ardhmja ime është e qartë. Kjo përvojë e bukur dhe shumë e gjatë me Juve do të përfundojë përfundimisht këtë vit. Sa i përket të ardhmes, kam ende dilema. Nëse gjej një klub tjetër që më jep stimuj, do të vijoj akoma, por në të kundërt do të tërhiqem përfundimisht”, deklaroi portieri italian.
Pavarësisht moshës 43-vjeçare, Buffon ende nuk duket i bindur se ai dëshiron të varë dorezat, por lamtumira me ngjyrat bardhezi tani është e sigurt, pas plot 19 sezonesh: “Unë mendoj se kam dhënë gjithçka për Juventusin. Kam marrë gjithçka dhe më shumë se kaq. Ne kemi arritur në fund të një cikli dhe është e drejtë të largohem”.
Buffon është lojtari me më shumë paraqitje në historinë e Serie A (656 ndeshje) dhe është i dyti për paraqitje në të gjitha kompeticionet në historinë e Juves (683 ndeshje, pas Del Piero). Sezonin e kaluar, si portieri i dytë, ai bëri 12 ndeshje në Serie A, Champions League dhe Coppa Italia, edhe nëse gjërat nuk shkuan saktësisht siç i imagjinonte ai.
“Na mungonte vazhdimësia, kundër 5-6 skuadrave më të mira në klasifikim. Në vend të kësaj, ne humbëm pikë kundër ekipeve të dobëta. Kjo do të thotë që ishim një skuadër që nuk u rritëm”.
