Protestat kundër regjimit iranian vijojnë të përshkallëzohen në disa qytete të vendit, ndërsa bilanci i viktimave po rritet nga ora në orë. Organizatat ndërkombëtare për të drejtat e njeriut raportojnë se numri i të vrarëve ka kaluar shifrën 50, duke shkuar deri në rreth 60–65 persona, ndërsa mijëra të tjerë janë arrestuar që nga nisja e demonstratave më 28 dhjetor.
Sipas organizatës Iran Human Rights, me qendër në Norvegji, të paktën 51 protestues janë vrarë deri tani, përfshirë edhe fëmijë nën moshën 18 vjeç. Aktivistë dhe burime të tjera flasin për një bilanc edhe më të rëndë, duke e çuar numrin e viktimave në rreth 65 të vdekur, megjithëse verifikimi i pavarur mbetet i vështirë për shkak të bllokimit të informacionit.
Situata në vend mbetet jashtëzakonisht e tensionuar, në kushtet e një ndërprerjeje pothuajse totale të internetit, e cila synon izolimin e Iranit nga bota dhe pengimin e raportimit nga terreni. Megjithatë, disa pamje po arrijnë të dalin në dritë përmes lidhjeve satelitore si Starlink, pavarësisht se përdorimi i tij është i ndaluar zyrtarisht nga autoritetet iraniane.
Në terren, protestat po zhvillohen në qytete të mëdha si Teherani, Mashhadi, Qomi, Yazdi dhe zona të tjera. Sipas dëshmive të aktivistëve, forcat e sigurisë po përdorin gaz lotsjellës, plumba gome dhe plumba të vërtetë për të shpërndarë turmat, ndërsa arrestimet masive po vazhdojnë. Deri më tani, mbi 2,200–2,300 persona janë arrestuar gjatë përplasjeve.
Presidenti i Shteteve të Bashkuara, Donald Trump, ka reaguar ashpër, duke paralajmëruar se Uashingtoni do të ndërhyjë nëse regjimi iranian vijon vrasjet ndaj protestuesve.
“Do t’i godasim shumë fort aty ku u dhemb”, deklaroi Trump nga Shtëpia e Bardhë, duke theksuar se çdo përfshirje amerikane nuk do të nënkuptojë dërgim të trupave tokësore. Ai shtoi se Irani ndodhet në një situatë tepër të vështirë dhe se protestuesit po arrijnë të marrin kontrollin e disa qyteteve, diçka që deri pak javë më parë dukej e pamundur.
BBC ka verifikuar pamje të reja nga Teherani, ku shihen turma protestuesish që brohorasin slogane kundër regjimit dhe shprehin mbështetje për monarkinë Pahlavi, e rrëzuar në vitin 1979. Ndërkohë, shumë familje jashtë Iranit raportojnë se kanë humbur kontaktet me të afërmit e tyre prej ditësh, për shkak të bllokimit të komunikimit.
Media shtetërore iraniane ka ashpërsuar ndjeshëm gjuhën ndaj protestuesve, duke i cilësuar fillimisht si “trazira” dhe më pas si “terroristë të armatosur”. Ajo transmeton pamje të përplasjeve dhe pretendon se protestuesit janë përgjegjës për vrasjen e civilëve dhe forcave të sigurisë, ndërsa nuk raporton për viktimat civile të shkaktuara nga forcat shtetërore.
Në planin ndërkombëtar, liderët e Francës, Gjermanisë dhe Mbretërisë së Bashkuar kanë reaguar me një deklaratë të përbashkët, ku shprehin shqetësim të thellë për përdorimin e dhunës ndaj protestuesve dhe dënojnë vrasjet. Ata i bëjnë thirrje autoriteteve iraniane të tregojnë përmbajtje, të ndalojnë represionin dhe të respektojnë të drejtën e qytetarëve për shprehje të lirë dhe tubim paqësor.
Protestat vijojnë të tronditin Iranin, ndërsa bilanci i viktimave mbetet ende i hapur dhe pritet të rritet, në një nga valët më të forta të kundërshtimit ndaj regjimit në vitet e fundit.
